Hardik Pandya IPL Salary: రూ.10 లక్షల నుంచి రూ.140 కోట్లకు.. హార్దిక్ పాండ్యా ఐపీఎల్ సంపాదన ఎంతంటే..?

Hardik Pandya IPL Earnings: ముంబై ఇండియన్స్ కెప్టెన్ హార్దిక్ పాండ్యా ఐపీఎల్‌ 2027 సీజన్‌లో కొత్త జెర్సీలో కనిపించనున్నాడు. పంజాబ్ కింగ్స్‌ జట్టు తరుఫున బరిలోకి దిగనున్నాడు. పంజాబ్‌కు పాండ్యాను ఇచ్చిన ముంబై.. ఆ జట్టు నుంచి అర్ష్‌దీప్‌ సింగ్‌ను ట్రేడ్ చేసుకుంది. ఈ ట్రేడ్ డీల్‌తో ఇద్దరి ఆటగాళ్లకు చెరో రూ.18 కోట్ల పారితోషికం లభించింది. పాండ్యా ముంబై ఇండియన్స్‌ను వీడడం ఎప్పుడో ఖాయమైనా.. ఏ జట్టులోకి వెళతాడనే విషయం ఇన్నాళ్లు అందరిలోనూ ఉత్కంఠరేపింది. చెన్నై సూపర్ కింగ్స్, కోల్‌కతా నైట్‌రైడర్స్ ఫ్రాంచైజీలు కూడా పాండ్యా ట్రేడ్ కోసం ప్రయత్నించాయి. అయితే చివరకు పంజాబ్ కింగ్స్‌తో డీల్ పూర్తయింది. తొలి సీజన్‌లో ముంబై ఇండియన్స్ నుంచి కేవలం రూ.10 లక్షల పారితోషికం అందుకున్న పాండ్యా.. ఇప్పుడు కోట్ల రూపాయల విలువైన ఆటగాడిగా ఎదిగాడు. ఇప్పటివరకు ఐపీఎల్‌లో అతడికి అందిన మొత్తం జీతం సుమారు రూ.122 కోట్లు. అసలు ఏ సీజన్‌లో ఏ జట్టు తరఫున ఆడాడు..? ఎంత పారితోషికం అందుకున్నాడు..? వివరాలు  ఇలా..

రూ.10 లక్షలతో మొదలై..

హార్దిక్ పాండ్యా 2015లో ముంబై ఇండియన్స్ తరఫున ఐపీఎల్‌లో అరంగేట్రం చేశాడు. వేలంలో పాండ్యాను కేవలం రూ.10 లక్షలకే ముంబై దక్కించుకుంది. 2015, 2016, 2017 సీజన్లలోనూ అంతే మొత్తానికి ముంబై జట్టులో కొనసాగాడు. పాండ్యా ఆటతీరుతో ఆకట్టుకోవడంతో ముంబై ఇండియన్స్ అతడిపై నమ్మకం పెట్టుకుంది. 2018 సీజన్‌కు ముందు పాండ్యా పారితోషికాన్ని ఏకంగా రూ.11 కోట్లకు పెంచింది. 2018 నుంచి 2021 వరకు వరుసగా నాలుగు సీజన్ల పాటు ఇదే మొత్తాన్ని అందుకున్నాడు. ఈ నాలుగేళ్లలోనే అతడి ఐపీఎల్ సంపాదన రూ.44 కోట్లకు చేరింది.

2022 ఐపీఎల్ సీజన్‌లో హార్దిక్ పాండ్యా ముంబై ఇండియన్స్‌ను వీడి కొత్తగా టోర్నీలోకి వచ్చిన గుజరాత్ టైటాన్స్ జట్టులో చేరాడు. ఆ జట్టు నుంచి రూ.15 కోట్ల పారితోషికం కేటాయించడంతో పాటు కెప్టెన్సీ బాధ్యతలు అప్పగించింది. ఈ అవకాశాన్ని పాండ్యా అద్భుతంగా ఉపయోగించుకున్నాడు. తొలి సీజన్‌లోనే గుజరాత్ టైటాన్స్‌ను ఛాంపియన్‌గా నిలిపాడు. ఆ తరువాత సీజన్‌లోనూ జట్టును ఫైనల్‌కు చేర్చాడు. ఆ రెండు సీజన్లలోనూ అతడికి రూ.15 కోట్ల చొప్పున పారితోషికం లభించింది.

మళ్లీ ముంబైలోకి..

2024 సీజన్‌కు ముందు ముంబై ఇండియన్స్ మరోసారి హార్దిక్ పాండ్యాను తమ జట్టులోకి తీసుకుంది. అతడికి రూ.15 కోట్ల పారితోషికం ఇచ్చింది. అంతేకాకుండా జట్టు కెప్టెన్సీ బాధ్యతలను కూడా అప్పగించింది. 2025, 2026 సీజన్లలో పాండ్యా పారితోషికం రూ.16.35 కోట్లకు పెంచింది. తాజాగా 2027 ఐపీఎల్ సీజన్‌కు ముందు హార్దిక్ పాండ్యా మరోసారి జట్టు మారాడు. ముంబై ఇండియన్స్, పంజాబ్ కింగ్స్ మధ్య జరిగిన ట్రేడ్ ఒప్పందంలో భాగంగా హార్దిక్ పంజాబ్ జట్టులోకి వెళ్లనున్నాడు. ఈ ఒప్పందంలో భాగంగా అర్ష్‌దీప్ సింగ్ ముంబై ఇండియన్స్‌కు మారనున్నాడు. 2027 సీజన్‌లో పంజాబ్ తరఫున హార్దిక్‌కు రూ.18 కోట్ల పారితోషికం లభించనుంది. 2027 సీజన్‌లో పంజాబ్ కింగ్స్ నుంచి అందుకోనున్న రూ.18 కోట్లను కలిపితే పాండ్యా ఐపీఎల్ కాంట్రాక్టుల మొత్తం విలువ రూ.140 కోట్లకు చేరుతుంది.  

ఐపీఎల్‌ ఎంతోమంది యువ క్రికెటర్లకు తమ ప్రతిభను నిరూపించుకునే వేదికగా నిలిచింది. ఈ టోర్నీ ద్వారా అంతర్జాతీయ స్థాయిలో గుర్తింపు తెచ్చుకున్న ఆటగాళ్లలో హార్దిక్ పాండ్యా ఒకడు. బ్యాటింగ్, బౌలింగ్‌తో పాటు ఫినిషర్‌గా కూడా తన ప్రత్యేకతను చాటుకున్నాడు. మొదట్లో తక్కువ పారితోషికంతో ఆడిన పాండ్యా.. తన ఆటతీరుతో కోట్ల రూపాయల కాంట్రాక్టులు అందుకునే స్థాయికి చేరుకున్నాడు. టీమిండియాలో కూడా స్టార్ ఆల్‌రౌండర్‌గా గుర్తింపు తెచ్చుకున్నాడు. ఇప్పటివరకు ఒక్కసారి కూడా ట్రోఫీ గెలవని పంజాబ్‌కు ఆ కల నెరవేర్చుతాడేమో చూడాలి.