తెలంగాణ కాంగ్రెస్‌కు కొత్త సారథి.. మీనాక్షి నటరాజన్ స్థానంలో బీఎం సందీప్ కుమార్ నియామకం..!!

BM Sandeep Kumar: తెలంగాణ కాంగ్రెస్ పార్టీ సంస్థాగత వ్యవహారాల్లో AICC కీలక మార్పు చేపట్టింది. రాష్ట్ర పార్టీ వ్యవహారాల ఇన్‌ఛార్జిగా బాధ్యతలు నిర్వర్తిస్తున్న మీనాక్షి నటరాజన్‌ను ఆ బాధ్యతల నుంచి తప్పిస్తూ.. ఆమె స్థానంలో సీనియర్ నేత బీఎం సందీప్ కుమార్‌ను నూతన ఇన్‌ఛార్జిగా నియమించింది. ఈ మేరకు ఏఐసీసీ ప్రధాన కార్యదర్శి కేసీ వేణుగోపాల్ అధికారిక ఉత్తర్వులు జారీ చేశారు.

గత కొంతకాలంగా తెలంగాణలో పార్టీ బలోపేతం, ప్రభుత్వ-పార్టీ సమన్వయంపై ప్రత్యేక దృష్టి సారించిన కాంగ్రెస్ అధిష్ఠానం.. రాబోయే స్థానిక సంస్థల ఎన్నికలు, భవిష్యత్ రాజకీయ సమీకరణాలను దృష్టిలో ఉంచుకుని ఈ నిర్ణయం తీసుకున్నట్లు తెలుస్తోంది. ఇప్పటివరకు తెలంగాణ ఇన్‌ఛార్జిగా పనిచేసిన మీనాక్షి నటరాజన్ స్థానంలో బాధ్యతలు చేపట్టనున్న సందీప్ కుమార్, రాష్ట్ర నాయకత్వంతో కలిసి పార్టీని మరింత ముందుకు తీసుకెళ్లే దిశగా పనిచేయనున్నారు. ఏఐసీసీ తీసుకున్న ఈ ఆకస్మిక నిర్ణయంపై తెలంగాణ కాంగ్రెస్ వర్గాల్లో ఆసక్తికర చర్చ జరుగుతోంది.

మధ్యప్రదేశ్ కు చెందిన మాజీ ఎంపీ మీనాక్షి నటరాజన్‌ను 2025 ఫిబ్రవరి 14న తెలంగాణ కాంగ్రెస్ వ్యవహారాల ఇన్‌చార్జ్‌గా నియమించారు. అయితే, ఈ ఏడాది జూన్‌లో మధ్యప్రదేశ్ నుంచి రాజ్యసభ ఎన్నికలకు కాంగ్రెస్ అభ్యర్థిగా ఆమె నామినేషన్ దాఖలు చేసినప్పుడు.. తెలంగాణలో తనపై దాఖలైన కేసు వివరాలను వెల్లడించలేదనే కారణంతో రిటర్నింగ్ అధికారి ఆమె నామినేషన్‌ను తిరస్కరించారు. ఈ పరిణామాల నేపథ్యంలో, ఆమె పార్టీ బాధ్యతల నుంచి విరామం తీసుకున్నారు. సెప్టెంబర్ 15న, ఆమె యూనివర్సిటీ కాలేజ్ లండన్‌లో వాతావరణ మార్పు,  సుస్థిర విధానంపై కోర్సు అభ్యసించేందుకు లండన్‌కు వెళ్లారు.  అప్పటి నుంచి తెలంగాణకు కొత్త ఇన్‌చార్జ్‌ను నియమించేందుకు ప్రచారం జరుగుతోంది. ఈ పదవికి పలువురు సీనియర్ నాయకులను పరిశీలిస్తున్నట్లు వార్తలు వచ్చాయి. చివరకు, హైకమాండ్ ఆకస్మికంగా ఈ బాధ్యతను బీఎం సందీప్‌కు అప్పగించింది.

2023 నుంచి తెలంగాణలో కాంగ్రెస్ వ్యవహారాల బాధ్యతలను నలుగురు నాయకులు నిర్వహించారు. మహారాష్ట్రకు చెందిన మాణిక్రావ్ థాక్రే 2023 జనవరి నుంచి అదే ఏడాది డిసెంబర్ వరకు ఈ పదవిలో ఉన్నారు. ఆ తర్వాత, పశ్చిమ బెంగాల్‌కు చెందిన దీపదాస మున్షి ఫిబ్రవరి 2025 వరకు ఈ పదవిలో ఉన్నారు. ఆమె స్థానంలో మీనాక్షి నటరాజన్ నియమితులయ్యారు. తాజాగా సందీప్ కుమార్‌ను నియమించారు. ఈ కొత్త ఇన్‌చార్జ్ రాష్ట్రంలో పార్టీ సంస్థాగత నిర్మాణం, ప్రభుత్వం-పార్టీ మధ్య సమన్వయం, క్షేత్రస్థాయి కార్యకర్తలతో సంబంధాలు వంటి విషయాలను పర్యవేక్షిస్తారు.

బి.ఎం. సందీప్ కుమార్ ఎవరు?
సందీప్ కుమార్ కర్ణాటకలోని చిక్‌మగళూరుకు చెందినవారు. ఆయన కాంగ్రెస్ పార్టీలో పలు సంస్థాగత బాధ్యతలు నిర్వహించారు. ఇతర రాష్ట్రాలలో పనిచేసిన అనుభవం ఉంది. ఆయన గతంలో మహారాష్ట్ర, గుజరాత్‌లలో కాంగ్రెస్ వ్యవహారాల ఇన్‌చార్జ్‌గా పనిచేశారు. ఆయన రాజీవ్ గాంధీ పంచాయతీ రాజ్ సంఘటన్ కర్ణాటక విభాగానికి ఛైర్మన్‌గా, ఆ సంస్థకు జాతీయ కన్వీనర్‌గా కూడా పనిచేశారు. ఈ అనుభవంతో, తెలంగాణలో పార్టీ వ్యవహారాలను ఆయన ఎలా నిర్వహిస్తారోనని రాజకీయ వర్గాలు ఆసక్తిగా గమనిస్తున్నాయి.

తెలంగాణ కాంగ్రెస్ కొత్త ఇన్‌చార్జ్‌గా నియమితులైన బి.ఎం. సందీప్ కుమార్‌కు పి.సి.సి. అధ్యక్షుడు మహేష్ కుమార్ గౌడ్ అభినందనలు తెలిపారు. శనివారం విడుదల చేసిన ఒక ప్రకటనలో, ఆయన నాయకత్వంలో రాష్ట్రంలో కాంగ్రెస్ మరింత బలపడుతుందని ఆశాభావం వ్యక్తం చేశారు. రాష్ట్రంలో పార్టీని బలోపేతం చేయడానికి, దాని సంస్థను నిర్మించడానికి కృషి చేసిన గత ఇన్‌చార్జ్ మీనాక్షి నటరాజన్‌ను ఆయన ప్రశంసించారు.