గడువు ముగిసింది.. చదువుకోవాలనే ఆశ ఆగిపోవాలా? మరో అవకాశం కోసం ఎదురుచూస్తున్న పేద విద్యార్థులు..!!

BRAOU Admissions 2026-27: ఉన్నత విద్యను అభ్యసించాలనే ఆశ ఉన్నప్పటికీ వివిధ కారణాలతో దరఖాస్తు చేసుకోలేకపోయిన విద్యార్థులకు మరో అవకాశం కల్పించాలని డాక్టర్ బీఆర్ అంబేద్కర్ ఓపెన్ యూనివర్సిటీ అధికారులను విద్యార్థులు కోరుతున్నారు. 2026-27 విద్యా సంవత్సరానికి సంబంధించి డిగ్రీ, పీజీ తదితర కోర్సుల్లో ప్రవేశాల కోసం దరఖాస్తు చేసుకునే గడువు అక్టోబర్ 13తో ముగిసింది. అయితే ఇప్పటికీ చాలామంది విద్యార్థులు దరఖాస్తు చేసుకోలేకపోయారని, వారి పరిస్థితిని దృష్టిలో ఉంచుకుని అడ్మిషన్ల గడువును మరోసారి పొడిగించాలని వైస్ ఛాన్స్‌లర్‌కు విజ్ఞప్తి చేస్తున్నారు.

అక్టోబర్ 13తో ముగిసిన గడువు:
అంబేద్కర్ ఓపెన్ యూనివర్సిటీ 2026-27 విద్యా సంవత్సరానికి వివిధ కోర్సుల్లో ప్రవేశాల కోసం దరఖాస్తులను ఆహ్వానించింది. తొలుత సెప్టెంబర్ 15తో ముగియాల్సిన ఓపెన్ అండ్ డిస్టెన్స్ లెర్నింగ్ (ODL), ఆన్‌లైన్ కోర్సుల ప్రవేశాల గడువును యూనివర్సిటీ గ్రాంట్స్ కమిషన్ (UGC) అక్టోబర్ 13 వరకు పొడిగించింది. ఈ నిర్ణయం దేశవ్యాప్తంగా గుర్తింపు పొందిన ఓపెన్, ఆన్‌లైన్ విద్యా సంస్థలకు వర్తించింది. దీంతో విద్యార్థులకు అదనపు సమయం లభించింది. అయినప్పటికీ ఇంకా కొంతమంది దరఖాస్తు ప్రక్రియను పూర్తి చేయలేకపోయారు.

గతంలోనూ అడ్మిషన్లకు అదనపు అవకాశాలు:
అంబేద్కర్ ఓపెన్ యూనివర్సిటీ గత విద్యా సంవత్సరాల్లోనూ ప్రవేశాల కోసం అదనపు అవకాశాలు కల్పించిన సందర్భాలు ఉన్నాయి. 2025-26 విద్యా సంవత్సరానికి జూన్ 30న ప్రవేశాల ప్రక్రియ ప్రారంభించినప్పుడు ఆగస్టు 13ను చివరి తేదీగా ప్రకటించారు. 2024-25 విద్యా సంవత్సరానికి జూలైలో అడ్మిషన్ల నోటిఫికేషన్ విడుదల చేసి ఆగస్టు 18ను చివరి తేదీగా నిర్ణయించారు. విద్యార్థుల అవసరాలు, ప్రవేశాల పరిస్థితులను బట్టి అడ్మిషన్ల షెడ్యూల్‌లో మార్పులు చేసుకునే అవకాశం యూనివర్సిటీకి ఉంది. గతేడాది నవంబర్ నెల వరకు పొడిగించినట్లు విద్యార్థులు చెబుతున్నారు.

పేద విద్యార్థులకు మరో అవకాశం ఇవ్వాలి:
ఓపెన్ యూనివర్సిటీలో చదువుకునే వారిలో గ్రామీణ ప్రాంతాలకు చెందిన పేద, మధ్యతరగతి కుటుంబాల విద్యార్థులు ఎక్కువగా ఉంటారు. కొంతమంది ఆర్థిక ఇబ్బందులతో వెంటనే ఫీజులు చెల్లించలేకపోతే, మరికొందరు కుటుంబ బాధ్యతలు, ఉద్యోగాలు, ఇతర వ్యక్తిగత కారణాలతో నిర్ణీత సమయంలో దరఖాస్తు చేసుకోలేకపోతున్నారు. ఉన్నత విద్యను అభ్యసించాలనే ఆసక్తి ఉన్నప్పటికీ గడువు ముగియడంతో వారి విద్యా సంవత్సరం వృథా అయ్యే పరిస్థితి ఏర్పడుతోంది.

జేఈఈ, నీట్ వంటి ప్రవేశ పరీక్షల దరఖాస్తుల విషయంలోనూ విద్యార్థుల అవసరాలు, పరిస్థితులను బట్టి గడువు పొడిగింపులు ప్రకటించిన సందర్భాలు ఉన్నాయి. అలాంటప్పుడు పేద విద్యార్థులకు ఉన్నత విద్యను అందుబాటులోకి తీసుకురావడమే లక్ష్యంగా పనిచేసే ఓపెన్ యూనివర్సిటీలోనూ అదనపు అవకాశం కల్పించాలని విద్యార్థులు కోరుతున్నారు.

వైస్ ఛాన్స్‌లర్ సానుకూలంగా స్పందించాలి:
అడ్మిషన్ల గడువును కనీసం మరో 15 రోజుల నుంచి నెల రోజుల పాటు పొడిగించాలని విద్యార్థులు కోరుతున్నారు. అవసరమైతే ఆలస్య రుసుముతో దరఖాస్తు చేసుకునే అవకాశాన్ని కల్పించాలని విజ్ఞప్తి చేస్తున్నారు. గతంలో ప్రవేశాల షెడ్యూల్‌లో మార్పులు చేసినట్లుగానే ఈసారి కూడా విద్యార్థుల విజ్ఞప్తిని పరిగణనలోకి తీసుకోవాలని కోరుతున్నారు.

ముఖ్యంగా ఆర్థికంగా వెనుకబడిన విద్యార్థుల భవిష్యత్తును దృష్టిలో ఉంచుకుని వైస్ ఛాన్స్‌లర్, యూనివర్సిటీ ఉన్నతాధికారులు ఈ అంశంపై సానుకూల నిర్ణయం తీసుకోవాలని విద్యార్థులు విజ్ఞప్తి చేస్తున్నారు. మరో అవకాశం కల్పిస్తే ఉన్నత విద్యకు దూరమవుతున్న ఎంతోమంది విద్యార్థులకు ప్రయోజనం కలుగుతుందని అభిప్రాయపడుతున్నారు.

Also Read: 

మోదీ దీపావళి గిఫ్ట్ రూ. 8 వేల ఆఫర్ నిజమేనా? వాట్సాప్‌లో ఆ లింక్ వస్తే బీ అలర్ట్..!!