Manchu Lakshmi: గొప్పమనసు చాటుకున్న మంచు లక్ష్మి.. తెలంగాణలోని 48 ప్రభుత్వ పాఠశాలల దత్తత.!.

Manchu Lakshmi adopts 48 government Schools in medak: ఇటీవల చాలా మంది సెలబ్రిటీలు  ఒకవైపు సినిమాలు తీస్తునే మరోవైపు తమ దాతృత్వంను కూడా చూపిస్తున్నారు. కొంత మంది అనాథశ్రమాలకు తమ చేయుతను అందిస్తున్నారు. మరికొంత మంది విద్యార్థులను దత్తత తీసుకుంటున్నారు. ఓల్డ్ ఏజ్ హోమ్ లకు సాయం అందిస్తున్నారు. కొందరు దీన్ని బైటకు చెప్పుకుంటే, మరికొంత మంది మాత్రం రహస్యంగా తమ మంచిపనులు చేస్తుంటారు. ఇలాంటి క్రమంలో తమ అభిమానులుకు సెలబ్రీటీలు  ఆదర్శంగా నిలుస్తున్నారు. అయితే.. తాజాగా.. టాలీవుడ్ నటి, మోహన్ బాబు కుమార్తె మంచు లక్ష్మి  గొప్ప మనసును చాటుకున్నారు.

గ్రామీణ ప్రాంత విద్యార్థులకు సైతం కార్పొరేట్ స్థాయి విద్యను అందించాలనే టార్గెట్ తో టీచ్ ఫర్ చేంజ్ అనే సంస్థతో మెదక్ జిల్లాలో ఉన్న 48 స్కూళ్లను దత్తత తీసుకుంటున్నట్లు ప్రకటించారు. దీనిలో భాగంగా సంగారెడ్డి జిల్లాలో పర్యటించిన మంచు లక్ష్మి.. చౌటకూర్ మండల కేంద్రంలోని ప్రభుత్వ పాఠశాలను సందర్శించారు. ఆయా స్కూళ్లలో టీచర్లు, విద్యార్థులతో మంచు లక్ష్మి మాట్లాడారు.  

క్లాసుల్లో డిజిటల్ బోధనలతో పాటు, స్మార్ట్ ఎల్ ఈడీ టీవీలతో పాటు మొదలైన మౌళిక వసతులు ఏర్పాటు చేస్తున్నట్లు మంచు లక్ష్మి వెల్లడించారు. ముఖ్యంగా విద్యార్థులకు నాణ్యమైన విద్యాబోధన అందించడమే తమ టార్గెట్ అని పేర్కొన్నారు. నాణ్యమైన విద్య అందితేనే పిల్లల  భవిష్యత్తు ఉన్నతంగా ఉంటుందని మంచు లక్ష్మి మాట్లాడారు. మరోవైపు 48 పాఠశాలలు దత్తత తీసుకొవడంపై ఆయా పాఠశాలలోని సిబ్బంది ప్రశంసలు కురిపిస్తున్నారు. ఇక మోహన్ బాబు, మంచు లక్ష్మి అభిమానులు సైతం ఈ నిర్ణయం పట్ల హర్షం వ్యక్తం చేస్తున్నారు.