1890ల నాటి తెలంగాణ ఆడపడుచులా ముస్తాబు.. గోచీ చీరలో బతుకమ్మ ఆడుతూ నెట్టింట వైరలైన యువతి!

Bathukamma Reel Video: తెలంగాణ సంస్కృతీ సంప్రదాయాలకు ప్రతీకగా భావించే పూల పండుగ  బతుకమ్మ సంబరాలు అంబరాన్నంటాయి. ఊరూవాడా రంగురంగుల పూలతో బతుకమ్మలను పేర్చి.. చప్పట్లు కొడుతూ ఆడపడుచులు భక్తిశ్రద్ధలతో బతుకమ్మలు ఆడుతున్నారు. అయితే, ఆధునిక కాలంలో వింత వింత పాశ్చాత్త సంస్కృతి అనుసరిస్తున్న నేటి రోజుల్లో.. కొందరు యువతులు తమ మూలాలను, ప్రాచీన సంప్రదాయాలను గుర్తుచేస్తూ.. అందరి దృష్టినీ ఆకర్షిస్తూ వస్తున్నారు. సరిగ్గా 1890ల కాలంలో తెలంగాణ మహిళలు ఎలాంటి దుస్తులు, ఆభరణాలు ధరించేవారో గుర్తు చేస్తూ.. ఓ యువతి చేసిన రీల్ వీడియో ప్రస్తుతం సోషల్ మీడియాలో విపరీతంగా వైరల్ అవుతోంది..

సుమారు 130 ఏళ్ల క్రితం తెలంగాణ పల్లెల్లో స్త్రీలు అద్భుతమైన కట్టుబొట్లతో జీవించేవారు.. ఆ నాటి కాలంలో మహిళలు ధరించే.. సాంప్రదాయక పసుపు రంగు గోచీ చీర, అప్పటి ప్రత్యేక ఆభరణాలు, నుదుటన పెట్టిన పెద్ద బొట్టు.. వీటన్నింటినీ పెట్టుకుని ఆ యువతి ముస్తాబైంది.. అంతేకాకుండా ప్రకృతి సిద్ధమైన తీరొక్క పూలతో అందంగా బతుకమ్మను పేర్చి.. నాటి గ్రామీణ యువతి లాగే పరవశించి ఆడుతూ రీల్ వీడియో పోస్ట్ చేసింది..

టైమ్‌లెస్ తను (Timeless Thanu) అనే ఇన్‌స్టాగ్రామ్ ఖాతా నుంచి షేర్ చేసిన ఈ రీల్ నెట్టింట విశేష ఆదరణ దక్కించుకుంటోంది. ఇప్పటివరకు ఈ వీడియోను లక్షలాది మంది వీక్షించగా.. లక్షకు పైగా లైకులు వచ్చాయి.. నేటి డిజిటల్ యుగంలో కేవలం ఆధునిక ట్రెండ్స్ వెంటే పడకుండా.. మన పూర్వీకుల జీవన విధానాన్ని, నాటి సంస్కృతిని గుర్తు చేస్తూ భావితరాలకు అందించే ప్రయత్నం చేయడాన్ని నెటిజన్లు ప్రశంసలు కురిపిస్తున్నారు.

చాలా మంది సోషల్ మీడియా వినియోగదారులు నిజమైన తెలంగాణ మూలాలను కళ్లముందుంచారు.. పాతకాలపు సంస్కృతికి అద్దం పట్టినట్లుంది.. అంటూ ప్రశంసలతో కామెంట్లు పెడుతున్నారు. బతుకమ్మ పండుగ వేళ మన పూర్వ వైభవాన్ని.. తరాల నాటి కట్టుబొట్టును గుర్తుచేస్తూ.. రూపొందించిన ఈ వీడియో తెలంగాణ సంస్కృతి సాంప్రదాయాన్ని మరోసారి చాటిచెప్పింది.