దీపావళి పూజకు వాడే వెండి, రాగి పాత్రలు నల్లగా మారాయా? ఈ సింపుల్ చిట్కాలతో తళతళ మెరిపించండి!
చాలామంది భారతీయ ఇళ్లలో సంప్రదాయబద్ధంగా వెండి, రాగి చెంబులు ఉంటాయి. సాధారణంగా వీటిని పూజ కార్యక్రమాల కోసం ఉపయోగిస్తుంటారు. కొన్ని ప్రత్యేక పండుగ సమయాల్లో అయితే అల్మారాలో పెట్టినవి కూడా తీసి వాడతారు. అయితే, ఇవి నల్లగా మారతాయి. ముఖ్యంగా పూజ, వ్రతం వంటి పవిత్రమైన సందర్భాలలో పెద్ద పరిమాణంలో ఉండే చెంబులను ఎక్కువగా వాడుతుంటారు. రానున్న దీపావళి పండుగ వేళ, మీ ఇంట్లో ఉన్న సిల్వర్ లేదా రాగి చెంబులు కాలక్రమేణా నల్లగా మారిపోయాయా? వాటిని తిరిగి కొత్త వాటిలా మెరిసేలా చేయాలనుకుంటున్నారా? అయితే ఈ సులభమైన టిప్స్‌తో మీరు వాటిని చాలా సులభంగా శుభ్రం చేసుకోవచ్చు.
How to Clean Silver and Copper Pooja Items: ఇంట్లో రాగి లేదా వెండి చెంబులను నిత్యం ఉపయోగిస్తున్నప్పుడు, అవి క్రమంగా నలుపు రంగులోకి మారిపోతుంటాయి. వీటిలో నీళ్లు పోసి దేవుడి గదిలో ఉంచుతుంటాం కాబట్టి, తేమ ఇతర కారణాల వల్ల వాటిపై నల్లటి మచ్చలు ఏర్పడుతుంటాయి. రానున్న దీపావళి సందర్భంగా, మీ ఇంట్లో ఉన్న పెద్ద చెంబులను లేదా పూజ కోసం వాడుతున్న వస్తువులను శుభ్రం చేసుకోవాలనుకుంటే, ఈ చిన్న చిట్కాలను పాటించండి. ఈ పద్ధతుల ద్వారా మీ ఇంట్లోని మెటల్ వస్తువులు మళ్ళీ కొత్త వాటిలా మెరిసిపోతాయి.
వెండి చెంబుల విషయానికి వస్తే, అవి తరచుగా నల్లగా మారుతుంటాయి. వెండి వస్తువులను ఎక్కువ రోజులు ఉపయోగిస్తున్నప్పుడు అవి నలుపు రంగులోకి మారడానికి ప్రధాన కారణం సిల్వర్ సల్ఫర్ తో చర్య జరపడం. గాలిలో ఉండే సల్ఫర్ వల్ల వెండిపై నల్లటి పొర ఏర్పడుతుంది, దీనివల్ల వాటిని శుభ్రం చేయడానికి గట్టిగా తోమాల్సి వస్తుంది. అయితే, కష్టపడకుండానే చాలా సులభంగా ఈ వెండి చెంబులను శుభ్రం చేసే మార్గం ఉంది.
దీని కోసం ముందుగా ఒక పెద్ద గిన్నెను తీసుకుని, దాని అడుగు భాగంలో అల్యూమినియం ఫాయిల్‌ను మెరిసే భాగం పైభాగం వైపు ఉండేలా పరచండి. ఇప్పుడు ఆ గిన్నెలో వేడి నీళ్లు పోసి, శుభ్రం చేయాల్సిన చెంబును పూర్తిగా మునిగేలా అందులో ఉంచండి. ఆ తర్వాత అందులో కొద్దిగా బేకింగ్ సోడా, ఉప్పు కూడా కలపండి. సుమారు 20 నిమిషాల తర్వాత, చెంబుపై ఉన్న నలుపు రంగు మచ్చలు క్రమంగా పోయి శుభ్రంగా మారుతాయి. ఆ తర్వాత ఏదైనా మెత్తని గుడ్డను ఉపయోగించి, నీటితో శుభ్రంగా కడిగి పక్కన పెట్టుకోవాలి.
అలాగే రాగి చెంబులను కూడా ఇంట్లో పూజల కోసం ఉపయోగిస్తుంటారు. వాటిని కూడా సులభంగా శుభ్రం చేయవచ్చు. దీనికోసం ఒక అర చెక్క నిమ్మకాయను కట్ చేసి, దానిపై ఒక టేబుల్ స్పూన్ ఉప్పు వేయాలి. ఆ నిమ్మకాయతోనే రాగి చెంబుపై ఉన్న మచ్చల మీద మృదువుగా రబ్ చేయాలి. ఇలా చేయడం వల్ల నిమ్మకాయలోని యాసిడిక్ గుణాలు, ఉప్పు కలిసి రాగిపై ఉన్న నల్లటి మచ్చలను సహజంగానే తొలగిస్తాయి. ఆ తర్వాత వాటిని నీళ్లతో కడిగి పూర్తిగా ఆరబెట్టుకోవాలి.
Read Also: దీపావళి పూజలో పాత మట్టి ప్రమిదలు వాడొచ్చా? 3 నిమిషాల్లో కొత్తవాటిలా మార్చే అద్భుతమైన హ్యాక్స్!
ఈ దీపావళి పండుగ సమయంలో మీరు వెండి లేదా రాగి చెంబులను ఉపయోగిస్తున్నట్లయితే, ఈ పద్ధతుల ద్వారా వాటిని సులభంగా శుభ్రం చేసి మెరిసేలా చేయవచ్చు. వస్తువులను గట్టిగా తోమాల్సిన అవసరం లేకుండానే చాలా సులభంగా శుభ్రం చేసుకోవచ్చు. ఒకవేళ మీ ఇంటి పూజా గదిలోని ఇతర లోహపు వస్తువులను శుభ్రం చేయాలనుకుంటే, 'పితాంబరి'ని ఉపయోగించవచ్చు. పితాంబరిని కొంచెం వేడి నీళ్లలో కలిపి వస్తువులను అందులో నానబెట్టి శుభ్రం చేస్తే, అవి త్వరగా తెల్లగా, కొత్త వాటిలా మెరిసిపోతాయి
