బంగాళాఖాతంలో అక్వాన్ పేరుతో మరో తుపాను..? మూడు రోజుల్లో క్లారిటీ.. ?

Akvan Toofan: అక్వాన్ తుఫాన్ పూర్తి స్థాయిలో ఏర్పడే విషయంలో ఇంకా స్పష్టత రాలేదని.. మరో మూడు, నాలుగు రోజుల్లో క్లారిటీ వస్తుందని భారత వాతావరణ శాఖ వెల్లడించింది. బంగాళాఖాతంలో తుఫాన్ ఏర్పడితే దానికి అక్వాన్ పేరు పెడతారని.. ఈ పేరును ఇరాన్ సజెస్ట్ చేసినట్టు భారత వాతావరణ శాఖ తెలిపింది.

2026, నవంబర్ 13వ తేదీ నాటికి దక్షిణ అండమాన్ సముద్రం, ఆగ్నేయ బంగాళాఖాతంలో అల్పపీడనం ఏర్పడే అవకాశం ఉందని వాతావరణ శాఖ అంచనా వేస్తోంది. ఈ అల్పపీడనం వాయుగుండంగా మారిన.. ఆ తర్వాత తుపాన్ గా మారుతుందా అనేది 15వ తేదీ నాటికి క్లారిటీ వస్తుందని తెలిపారు. తుఫాన్ ఏర్పడితే మాత్రం దానికి అక్వాన్ అనే పేరు ఉంటుందని వెల్లడించింది వాతావరణ శాఖ.

అయితే నవంబర్ 13వ తేదీన అల్పపీడనం ఏర్పడినంత మాత్రానా.. అది తుపానుగా మారుతుందని ఇప్పుడే చెప్పలేమని నిపుణులు స్పష్టం చేస్తున్నారు. అందుకు సముద్రంలోని వాతావరణ పరిస్థితులు అనుకూలంగా ఉండాలని వెల్లడించారు అధికారులు. ఈ వ్యవస్థ ముందుకు వెళ్లే తీరుపై ప్రస్తుతం మూడు అవకాశాలు ఉన్నాయని వాతావరణ నిపుణులు చెబుతున్న మాట.

మొదటి అవకాశంగా అల్పపీడనం బలపడి తమిళనాడు, దక్షిణ తీర ఆంధ్రప్రదేశ్ దిశగా కదలడం. రెండో అవకాశంగా దక్షిణ పశ్చిమ బంగాళాఖాతానికి చేరుకున్న తర్వాత సముద్రంలోనే దిశ మార్చుకోవడం. మూడో అవకాశంగా బంగాళాఖాతంలో ఏర్పడే అల్పపీడనం బలపడే సమయంలో దిశ మార్చుకుని మయన్మార్ తీరం వైపు వెళ్లడం. ఈ మూడు అంశాలను పరిగణలోకి తీసుకోవటం జరుగుతుందని వాతావరణ శాఖ నిపుణులు చెబుతున్నారు. 2026 అక్టోబర్ నెల చివరి వారంలో అర్నబ్ తుఫాను ఆంధ్రప్రదేశ్ తీరాన్ని తాకింది. ఆ తర్వాత నవంబర్ ప్రారంభంలో మురసు తుపాను కూడా ఏపీలోని తూర్పు తీరాన్ని ప్రభావితం చేసింది. ఇప్పుడు వరుసగా మూడో తుపాను ఏర్పడే సూచనలు కనిపించడంతో అధికారులు ఎప్పటికపుడు వాతావరణ శాఖకు సంబంధించిన వివరాలపై నిఘా పెంచారు.