బంగాళాఖాతంలో మరో అల్పపీడనం.. రేపు వాయుగుండంగా బలపడే అవకాశం..
low pressure in the Bay of Bengal sea : బంగాళాఖాతంలో మరోసారి వాతావరణ పరిస్థితులు మారుతున్నాయి. దక్షిణ అండమాన్ సముద్రం, దాని పరిసర ప్రాంతాల్లో అల్పపీడనం ఏర్పడినట్లు భారత వాతావరణ శాఖ వెల్లడించింది. దీనికి అనుబంధంగా సముద్రమట్టానికి 7.6 కిలోమీటర్ల ఎత్తు వరకు ఉపరితల ఆవర్తనం విస్తరించి ఉన్నట్లు అధికారులు తెలిపారు.
Heavy Rains: ఏపీకి అర్నబ్ తుపాను ముప్పు తప్పింది. మరోవైపు మురోసు తుపాను రాబోతున్నట్టు వాతావరణ శాఖ తెలిపింది. ఈ నేపథ్యంలో బంగాళాఖాతంలో ఏర్పడిన అల్పపీడనం పశ్చిమ-వాయవ్య దిశగా పయనిస్తూ రేపు ఆగ్నేయ బంగాళాఖాతం, అండమాన్ నికోబార్ దీవులు, అండమాన్ సముద్ర ప్రాంతాల్లో వాయుగుండంగా బలపడే అవకాశాలున్నాయిని భారత వాతావరణ శాఖ తెలిపింది.
సముద్రమట్టానికి 7.6 కి.మీ ఎత్తు వరకు ఉపరితల ఆవర్తనం..
తర్వాత రానున్న రెండు రోజుల్లో మరింత బలపడి, పశ్చిమ-వాయవ్య దిశగా కదులుతూ ఆంధ్రప్రదేశ్ తీరం వైపు పయనించే సూచనలు ఉన్నట్లు వాతావరణ శాఖ తెలిపింది. సముద్రమట్టానికి 7.6 కి.మీ ఎత్తు వరకు ఉపరితల ఆవర్తనం ఏర్పడింది. ఇది తుపానుగా మారుతుందా అనేదానిపై రానున్న రోజుల్లో పూర్తి స్పష్టత రానుంది. మరోవైపు, ఇటీవల ప్రభావం చూపిన 'అర్నబ్' తుపాను వాయుగుండంగా మారి, ఉత్తర ఛత్తీస్‌గఢ్ - వాయవ్య ఒడిశా వైపు పయనించి క్రమంగా అల్పపీడనంగా బలహీనపడింది.
కోస్తా, రాయలసీమ ప్రాంతాల్లో భారీ వర్షాలు..
తాజా వాతావరణ మార్పుల ప్రభావంతో రానున్న మూడు రోజుల పాటు ఆంధ్రప్రదేశ్‌లోని కోస్తా, రాయలసీమ ప్రాంతాల్లో అక్కడక్కడ తేలికపాటి నుంచి మోస్తరు వర్షాలు, కొన్ని చోట్ల ఉరుములతో కూడిన జల్లులు కురిసే అవకాశం ఉందని హెచ్చరించారు. కాగా, గత 24 గంటల్లో శ్రీకాకుళం జిల్లా కంచిలిలో అత్యధికంగా 24.8 సెం.మీ. భారీ వర్షపాతం నమోదైంది. తీర ప్రాంత ప్రజలు, మత్స్యకారులు అప్రమత్తంగా ఉండాలని అధికారులు సూచిస్తున్నారు.
