School Holidays: ఇవాళ కూడా స్కూళ్లకు సెలవు..తీరం దాటిన వాయుగుండం..ముఖ్యమంత్రి కీలక నిర్ణయం!

AP School Holidays: బంగాళాఖాతంలో ఏర్పడిన తీవ్ర వాయుగుండం అర్ధరాత్రి ఒంటి గంట ప్రాంతంలో తీరం దాటిందని విపత్తుల నిర్వహణ సంస్థ అధికారులు సీఎం నారా చంద్రబాబు నాయుడికి నివేదించారు. వర్షాలు తగ్గుముఖం పట్టే వరకు యంత్రాంగం అంతా క్షేత్రస్థాయిలోనే అందుబాటులో ఉండాలని, ఎక్కడా చిన్నపాటి ప్రాణనష్టం కూడా జరగకుండా ముందస్తు భద్రతా చర్యలు చేపట్టాలని ముఖ్యమంత్రి స్పష్టమైన ఆదేశాలు జారీ చేశారు. తీరం దాటిన తర్వాతి రోజుల్లో కూడా వర్షాల ప్రభావం ఎక్కువగా ఉండే అవకాశం ఉన్నందున, సెప్టెంబర్ 24, 25 తేదీలలో కలెక్టర్లు అత్యంత జాగ్రత్తగా వ్యవహరించాలని స్పష్టం చేశారు.

పాఠశాలలు, కళాశాలలకు సెలవుల ప్రకటన..
ఎడతెరిపి లేకుండా కురుస్తున్న వర్షాల వల్ల విద్యార్థుల రాకపోకలకు ఎలాంటి ప్రమాదం లేదా అసౌకర్యం కలగకుండా జాగ్రత్త చర్యగా ఎన్‌టీఆర్ జిల్లాలోని అన్ని అంగన్వాడీ సెంటర్లు, ప్రభుత్వ, ప్రైవేటు పాఠశాలలు, కళాశాలలకు 24.09.2026 (గురువారం) ఒక రోజు సెలవు ఇస్తున్నట్లు జిల్లా కలెక్టర్ డాక్టర్ జి. లక్ష్మీశ తెలిపారు. ఈ ఉత్తర్వులను పాఠశాలల ప్రధానోపాధ్యాయులు, ప్రిన్సిపాళ్లు తప్పనిసరిగా పాటించాలని ఆదేశించారు. వర్ష తీవ్రతను బట్టి ఇతర ప్రభావిత జిల్లాల్లోనూ సెలవులు ప్రకటించాలని సీఎం సూచించారు.

సహాయక చర్యలు, కంట్రోల్ రూమ్ ఏర్పాటు..
నదులు, రిజర్వాయర్లలోకి వచ్చే వరద నీటి ప్రవాహాన్ని నిరంతరం అంచనా వేస్తూ క్షేత్రస్థాయికి సమాచారం అందించాలని సీఎం ఆదేశించారు. శ్రీకాకుళం జిల్లాలో వర్షాల వల్ల దెబ్బతిన్న వరి పంట విస్తీర్ణాన్ని వెంటనే అంచనా వేయాలన్నారు. బాధితులకు తాగునీరు, ఆహారం, వైద్య సదుపాయాలు అందిస్తూ విద్యుత్ సరఫరాకు అంతరాయం కలగకుండా చూడాలన్నారు. సముద్రంలో వేటకు వెళ్లిన మత్స్యకారులను సురక్షితంగా ఒడ్డుకు తీసుకురావాలని సూచించారు.

ఈ సమీక్షలో శ్రీకాకుళం, విజయనగరం, విశాఖపట్నం, మన్యం, అల్లూరి సీతారామరాజు, అనకాపల్లి, పశ్చిమ గోదావరి, డాక్టర్ బీఆర్ అంబేడ్కర్ కోనసీమ, ఏలూరు, పోలవరం, కృష్ణా జిల్లాల కలెక్టర్లు పాల్గొన్నారు. ప్రజల అత్యవసర సహాయం కోసం 112, 1070, 1800-425-0101 టోల్ ఫ్రీ నంబర్లతో స్టేట్ కంట్రోల్ రూమ్ అందుబాటులో ఉంది.