Babu Mohan: నన్ను తీసుకోకపోవడమే వాళ్ల దురదృష్టం.. నాని ‘ది ప్యారడైజ్’పై బాబు మోహన్ సంచలన వ్యాఖ్యలు!

Babu Mohan: బాబు మోహన్ ఒక ఇంటర్వ్యూలో మాట్లాడుతూ.. ‘ది ప్యారడైజ్’ చిత్రబృందం తనను ప్రత్యేకంగా పిలిచిందని చెప్పారు. సినిమా కోసం ఒక ప్రత్యేకమైన గెటప్ వేసి లుక్ టెస్ట్ చేశారని వెల్లడించారు. తన లుక్ చూసిన తర్వాత బాగుందని ప్రశంసించారని, షూటింగ్ సమయంలో సమాచారం ఇస్తామని చెప్పి పంపించారని తెలిపారు. దీంతో ఆ సినిమాలో తనకు మంచి పాత్ర ఉంటుందని ఆయన ఆశించారట.

అయితే రోజులు గడుస్తున్నా చిత్రబృందం నుంచి ఎలాంటి పిలుపు రాలేదని బాబు మోహన్ చెప్పారు. చివరకు షూటింగ్ పూర్తయి సినిమా థియేటర్లలో విడుదలైన తర్వాత కూడా తనకు కనీస సమాచారం ఇవ్వలేదని వెల్లడించారు. ఒకవేళ తనను సినిమాలో తీసుకోవాలనే ఆలోచన లేకపోతే ఆ విషయాన్ని ముందుగానే చెప్పి ఉండాల్సిందని అన్నారు. తనను ఎంపిక చేయకపోవడం కంటే, కనీస మర్యాద పాటించకపోవడమే ఎక్కువ బాధ కలిగించిందని ఆయన అభిప్రాయపడ్డారు.

ఇదే సమయంలో సినిమా ఫలితంపై కూడా బాబు మోహన్ తనదైన శైలిలో స్పందించారు. తనను తీసుకోకపోవడం చిత్రబృందం దురదృష్టమని, తాను గోల్డెన్ లెగ్ అని సరదాగా వ్యాఖ్యానించారు. గతంలో దర్శకుడు ఈవీవీ సత్యనారాయణ తెరకెక్కించిన ‘చెవిలో పువ్వు’ సినిమా ఆశించిన ఫలితాన్ని అందుకోలేదని, ఆ తర్వాత తనతో చేసిన ‘ప్రేమఖైదీ’ మంచి విజయాన్ని సాధించిందని గుర్తు చేసుకున్నారు. తన సెంటిమెంట్ గురించి కూడా ప్రస్తావించారు.

బాబు మోహన్ వ్యాఖ్యలతో టాలీవుడ్‌లో నటీనటుల ఎంపిక, లుక్ టెస్టుల తర్వాత పాటించాల్సిన కనీస ప్రొఫెషనలిజంపై చర్చ మొదలైంది. ముఖ్యంగా ఎన్నో ఏళ్ల అనుభవం ఉన్న సీనియర్ నటుడికి ఇలాంటి అనుభవం ఎదురవడం పట్ల పలువురు ఆశ్చర్యం వ్యక్తం చేస్తున్నారు.

అయితే బాబు మోహన్ చేసిన వ్యాఖ్యలపై ఇప్పటివరకు ‘ది ప్యారడైజ్’ చిత్రబృందం నుంచి అధికారిక స్పందన రాలేదు. దర్శకుడు శ్రీకాంత్ ఓదెల లేదా నిర్మాతలు ఈ విషయంపై ఏమైనా వివరణ ఇస్తారా అనేది ఆసక్తికరంగా మారింది.