Gold Mine: జాక్‌పాట్.. డ్రైనేజీ పైపుల కోసం తవ్వితే.. వెలుగులోకి బంగారం నిధి..!

Gold Bars Found: బెల్జియంలో ఓ నిర్మాణ పనులు చేపట్టిన కార్మికులకు అనూహ్యంగా భారీ బంగారు నిధి దొరికింది. డ్రైనేజీ పైపుల ఏర్పాటు కోసం ఓ పాత భవనం వద్ద తవ్వకాలు చేస్తుండగా.. బంగారు కడ్డీలు, నాణేలు బయటపడ్డాయి. వీటి మొత్తం విలువ దాదాపు రూ.99 కోట్లు ఉంటుందని అంచనా వేస్తున్నారు. అయితే ఇంతటి విలువైన సంపద ఎవరిది..? దానిపై హక్కులు ఎవరికి దక్కుతాయనే విషయం ఇప్పుడు ఆసక్తికరంగా మారింది. వివరాలు ఇలా.. బెల్జియం రాజధాని బ్రస్సెల్స్‌కు దాదాపు 30 కిలోమీటర్ల దూరంలోని సింట్-గిల్లిస్-డెండర్‌మోండే ప్రాంతంలో ఈ నిధి వెలుగులోకి వచ్చింది. ఈ ఏడాది ఆగస్టు 11న ఓ పాత బీర్ తయారీ కేంద్రం ప్రాంగణంలో డ్రైనేజీ పనులు జరుగుతున్నాయి. ఈ క్రమంలో భవనం పునాదుల సమీపంలో తవ్వకాలు చేపట్టిన కార్మికులకు మొదట కొన్ని పాత నాణేలు కనిపించాయి.

అయితే మరింత లోతుగా తవ్వకాలు చేపట్టగా.. అక్కడ పెద్ద మొత్తంలో బంగారు సంపద ఉన్నట్లు గుర్తించారు. గోడల మధ్య ఇటుకలతో మూసివేసిన ప్రాంతంలో బంగారు కడ్డీలు, ఇతర విలువైన లోహాలు బయటపడ్డాయి. ఈ నిధిలో సుమారు 49 బంగారు కడ్డీలు ఉన్నట్లు తెలుస్తోంది. వీటిపై ప్రత్యేక గుర్తింపు సంఖ్యలు కూడా ఉన్నాయి. వీటితో పాటు వేలాది బంగారు నాణేలు లభ్యమైనట్లు పలు అంతర్జాతీయ మీడియా కథనాలు వెల్లడించాయి. ఈ సంపదను ఒక సంచిలో ఉంచి.. భవనం బేస్‌మెంట్ గోడ వెనుక ఇటుకలతో మూసివేసి దాచినట్లు తెలుస్తోంది. ఈ భవనం 19వ శతాబ్దం చివర్లో స్థానికంగా పేరున్న వాన్ ఏష్ కుటుంబానికి చెందిన థియోఫిలస్ వాన్ ఏష్ కోసం నిర్మించినట్లు చారిత్రక వివరాలను బట్టి తెలుస్తోంది.

ఈ భవనంలో 1899 నుంచి 1970 వరకు బీర్ తయారీ కార్యకలాపాలు కొనసాగినట్లు తెలుస్తోంది. ఆ తర్వాత భవనం యాజమాన్యం చేతులు మారింది. ప్రస్తుతం CAW Oost-Vlaanderen అనే సామాజిక సంక్షేమ సంస్థ ఆధీనంలో ఉంది. ఈ సంస్థ భవనాన్ని పునరుద్ధరించి కార్యాలయాలు, నివాస సముదాయాలుగా మార్చే పనులు చేపట్టింది. ఈ పునరుద్ధరణ పనుల్లో భాగంగానే గోడల వెనుక దాచిన బంగారం వెలుగులోకి వచ్చింది.

నిధి బయటపడిన వెంటనే కార్మికులు భవనం యాజమాన్యానికి సమాచారం ఇచ్చారు. అనంతరం పోలీసులకు అప్పగించారు. ప్రస్తుతం ఈ బంగారాన్ని బ్రస్సెల్స్‌లోని ప్రభుత్వ భద్రతా కేంద్రంలో భద్రపరిచారు. దాని మూలాలు, అసలు యజమాని ఎవరనే విషయాలపై అధికారులు దర్యాప్తు చేస్తున్నారు. ఈ సంపద ఏదైనా చోరీకి సంబంధించిందా..? లేదా గతంలో ఎవరైనా భద్రత కోసం దాచిపెట్టారా..? అనే కోణాల్లోనూ పరిశీలిస్తున్నారు.

ఈ నిధిపై వాన్ ఏష్ కుటుంబ వారసులు హక్కులు కోరే అవకాశం ఉంది. మరోవైపు ప్రస్తుత భవన యజమాని, నిధిని గుర్తించిన నిర్మాణ కార్మికులు కూడా తమకు హక్కులు ఉన్నాయని వాదించే ఛాన్స్ కూడా ఉంది. అయితే చారిత్రక సంబంధం ఉన్నంత మాత్రాన బంగారం వారిదేనని చెప్పలేమని.. అందుకు తగిన ఆధారాలు సమర్పించాల్సి ఉంటుందని అధికారులు చెబుతున్నారు. బెల్జియం చట్టాల ప్రకారం ఈ సంపదకు అసలైన యజమాని ఎవరనేది నిరూపించుకునేందుకు ఐదేళ్ల సమయం ఉంటుంది. ఈ గడువు 2031 వరకు కొనసాగనుంది. అప్పటిలోగా సరైన ఆధారాలతో ఎవరూ ముందుకు రాకపోతే.. చట్టపరమైన నిబంధనల ప్రకారం నిధిని గుర్తించిన వ్యక్తికి, ఆ భవనం యజమానికి మధ్య సంపదను పంచే అవకాశం ఉంది.

మరోవైపు ఈ నిధి బయటపడిన విషయం అంతర్జాతీయంగా చర్చనీయాంశమైంది. కొందరు తమ పూర్వీకులకు ఈ ప్రాంతంతో సంబంధం ఉందని చెబుతుండగా.. మరికొందరు వాన్ ఏష్ కుటుంబంతో తమకు బంధుత్వం ఉందని పేర్కొంటున్నారు. ప్రస్తుతం ఈ బంగారు సంపద ప్రభుత్వ ఆధీనంలోనే ఉంది. దాని అసలు యజమాని ఎవరో తేలడానికి మరికొంత సమయం పట్టే అవకాశం ఉంది.