North America Telugu Society: అమెరికాలో అంబరాన్నంటిన తెలుగు పండుగ సంబరాలు..!

NATS: అమెరికా గడ్డపై సంస్కృతి, సాంప్రదాయాలు, సేవా దృక్పథాన్ని చాటుతూ.. తెలుగుదనం వెల్లివిరిసింది. ఒకవైపు షార్లెట్‌లో తెలుగు పండుగ కన్నులపండువగా సాగగా.. మరోవైపు మిషిగన్‌లో ఉత్తర అమెరికా తెలుగు సంఘం (నాట్స్) సరికొత్త చాప్టర్‌తో సేవా ప్రస్థానాన్ని విస్తరించింది. స్థానిక ప్రవాస తెలుగు వారు పెద్ద ఎత్తున తరలివచ్చి ఈ రెండు వేడుకలను విజయవంతం చేశారు. షార్లెట్ నగరంలో నిర్వహించిన 'షార్లెట్ తెలుగు సంబరాలు 2026' గ్రాండ్‌గా ముగిశాయి. చిన్నారుల నుంచి పెద్దల వరకు ప్రదర్శించిన శాస్త్రీయ సంగీతం, సంప్రదాయ నృత్యాలు, ఉర్రూతలూగించిన ఫ్రీస్టైల్ డ్యాన్సులు అక్కడికి వచ్చిన వారిని ఆకట్టుకున్నాయి.

ఈ వేడుకల్లో ఏర్పాటు చేసిన ‘సైన్స్ ఫెస్ట్’ ప్రత్యేక ఆకర్షణగా నిలవగా.. డ్రై ఐస్ మ్యాజిక్, ప్లాస్మా బాల్ ప్రదర్శనలతో పాటు 9 రకాల వైజ్ఞానిక ప్రయోగాలను చిన్నారులకు కళ్లకు కట్టినట్లు వివరించారు. ఈ ప్రయోగాత్మక ప్రదర్శనలు పిల్లల్లో సైన్స్ పట్ల అమితమైన ఆసక్తిని రేకెత్తించాయి. తానా, జీటీఏ, ఆప్టా వంటి ప్రముఖ తెలుగు సంఘాల సమన్వయంతో సాగిన ఈ కార్యక్రమానికి నాట్స్ అధ్యక్షుడు రాజ్ అల్లాడా ముఖ్య అతిథిగా హాజరయ్యారు. ఈ సందర్భంగా దాదాపు 800 మందికి పైగా కొత్త సభ్యులుగా నమోదు చేసినట్లు నిర్వాహకులు వెల్లడించారు. కార్యక్రమాన్ని విజయవంతం చేసిన కళాకారులకు, వాలంటీర్లకు, స్పాన్సర్లకు వారు ప్రత్యేక ధన్యవాదాలు తెలిపారు.

మరోవైపు.. భాషా సంస్కృతుల పరిరక్షణ, సేవా విస్తరణే ధ్యేయంగా ఫార్మింగ్టన్ హిల్స్ వేదికగా నాట్స్ మిషిగన్ చాప్టర్‌ను ఘనంగా ప్రారంభించారు. ఈ కొత్త విభాగానికి శ్రీదేవి మణేపల్లి కోఆర్డినేటర్‌గా, మహి బొల్లవరం జాయింట్ కోఆర్డినేటర్‌గా బాధ్యతలు స్వీకరించారు. రవి చాలంటి (ఈవెంట్స్ & లాజిస్టిక్స్), హేమ సూరపరాజు (ట్రెజరర్), జ్యోతి జవ్వాది (మెంబర్‌షిప్), అనుపమ దివాకర్ల (పీఆర్ & మీడియా) నూతన కార్యవర్గంలో కీలక బాధ్యతలు చేపట్టారు.

ఈ సందర్భంగా నాట్స్ చైర్మన్ కిషోర్ కంచర్ల మాట్లాడుతూ.. ఆపదలో ఉన్న తెలుగు వారికి తమ హెల్ప్‌లైన్ ద్వారా అందిస్తున్న అత్యవసర సహాయ కార్యక్రమాల గురించి వివరించారు. నిస్వార్థ ప్రజాసేవకు, సమాజ హితానికి నాట్స్ ఎల్లప్పుడూ కట్టుబడి ఉంటుందని నాట్స్ అధ్యక్షుడు రాజ్ అల్లాడా తెలిపారు. ఈ సందర్భంగా వివిధ రంగాల్లో విశిష్ట సేవలందిస్తున్న మనోరమ గాంధీ, కూచిపూడి కళా ప్రోత్సాహకురాలు సంధ్య శ్రీ ఆత్మకూరి, తెలుగు వెలుగులను పంచుతున్న 'మనబడి' బృందం, సామాజిక కార్యకర్త సన్నీ రెడ్డి, వైద్య-సినీ రంగాల్లో ప్రతిభ చాటుతున్న డాక్టర్ హరినాథ్ పోలిచెర్లను వేదికపై సత్కరించారు. 

స్థానిక విద్యార్థులు ప్రదర్శించిన కూచిపూడి నృత్యాలు ఆహుతులను మంత్రముగ్ధులను చేశాయి. ఈ ఆత్మీయ సమ్మేళనంలో ఆప్టా, డెట్రాయిట్ తెలుగు అసోసియేషన్, డెట్రాయిట్ తెలంగాణ కమ్యూనిటీ, ఇండియన్ ఓవర్సీస్ కాంగ్రెస్ ప్రతినిధులు పాల్గొన్నారు. మహిళా సాధికారత, యువ నాయకత్వం, ఆరోగ్యం, క్రీడలు, సాంస్కృతిక వికాసాన్ని ప్రోత్సహిస్తూ ప్రతి మూడు నెలలకొకసారి భారీ సామాజిక సేవా కార్యక్రమాన్ని నిర్వహించాలని మిషిగన్ చాప్టర్ నిర్ణయించింది.