EPF Deduction Hike: ఉద్యోగులకు బిగ్ అలర్ట్..టేక్ హోమ్ శాలరీ మారనుందా? పే-స్లిప్‌లో భారీ ప్రభావం!

EPF Deduction Hike Update: ఉద్యోగుల సామాజిక భద్రత, రిటైర్మెంట్ సేవింగ్స్ మెరుగుపరచడం లక్ష్యంగా కేంద్ర కేబినెట్ పీఎఫ్ వేతన పరిమితి పెంపునకు ఆమోదం తెలిపింది. గతంలో ఉన్న రూ. 15,000 గరిష్ట పరిమితిని రూ. 25,000కు పెంచుతూ ప్రభుత్వం నిర్ణయించింది. దాదాపు 12 సంవత్సరాల విరామం తర్వాత ఈ సవరణ జరగడం విశేషం. ఈ తాజా మార్పుతో దేశవ్యాప్తంగా అదనంగా మరో 51 లక్షల మందికి పైగా ఉద్యోగులు పీఎఫ్ పరిధిలోకి వచ్చి సామాజిక భద్రతను పొందనున్నారు.

జీతం, టేక్-హోమ్ శాలరీ లెక్కింపు..
భారతదేశంలో కంపెనీలు పాటించే కాస్ట్ టూ కంపెనీ (CTC) మోడల్ ఆధారంగా జీతాల నిర్మాణం ఉంటుంది. సీటీసీలో బేసిక్ శాలరీ, కరవు భత్యం (DA), ఇంటి అద్దె భత్యం (HRA) వంటి నేరుగా చెల్లించే వేతనాలతో పాటు పీఎఫ్ రూపంలో యజమాని చెల్లించే పరోక్ష నిధులు కూడా ఉంటాయి.

పాత నిబంధనల ప్రకారం రూ. 15,000 వేతన పరిమితిపై ఉద్యోగి, యజమాని ఇద్దరూ చెరో 12 శాతం చొప్పున నెలకు రూ. 1,800 వంతున పీఎఫ్ ఖాతాలో జమ చేసేవారు. అయితే ప్రస్తుత సవరణతో ఈ 12 శాతం లెక్కింపు రూ. 25,000 వేతనంపై జరుగుతుంది. దానివల్ల నెలకు ప్రతి ఒక్కరి వాటా రూ. 3,000కు పెరుగుతుంది.

చేతికి అందే నగదుపై ప్రభావం..
కొత్త విధానంలో ఉద్యోగి పీఎఫ్ విరాళం రూ. 1,800 నుండి రూ. 3,000కు అంటే నెలకు రూ. 1,200 పెరుగుతుంది. అలాగే యజమాని చెల్లించాల్సిన వాటా కూడా అదనంగా రూ. 1,200 పెరుగుతుంది. ఫిక్స్డ్ సీటీసీ విధానం పాటించే కంపెనీలు యజమానిపై పడే ఈ అదనపు భారాన్ని తగ్గించుకోవడానికి ఇతర అలవెన్సుల్లో కోత విధించే అవకాశం ఉంది.

దీనివల్ల ఉద్యోగికి ప్రతి నెలా చేతికి అందే టేక్-హోమ్ శాలరీ రూ. 2,400 వరకు తగ్గుతుందని ఆర్థిక నిపుణులు అంచనా వేస్తున్నారు. అయితే ఈ అదనపు నగదు ఉద్యోగి పీఎఫ్ ఖాతాలోనే సురక్షితంగా ఉంటూ చక్రవడ్డీ ద్వారా భవిష్యత్తులో పెరుగుతుందని గుర్తించాలి.

ఉద్యోగులు చేయాల్సిన పని..
పెరిగిన ఈ భారాన్ని సర్దుబాటు చేసుకోవడంపై ప్రస్తుతం వివిధ రకాల కంపెనీలు కసరత్తు చేస్తున్నాయి. కొన్ని కంపెనీలు సీటీసీ ప్యాకేజీని పెంచడానికి సిద్ధపడినా, మరికొన్ని పాత ప్యాకేజీలోనే భత్యాలను మారుస్తూ సర్దుబాటు చేసే అవకాశం ఉంది. కాబట్టి ఉద్యోగులు తమ రాబోయే పే-స్లిప్స్‌ను క్షుణ్ణంగా పరిశీలించుకోవాలని, ఏవైనా సందేహాలు ఉంటే తమ కంపెనీ హెచ్‌ఆర్ (HR) టీమ్‌ను సంప్రదించాలని నిపుణులు సూచిస్తున్నారు.