VDA Hike: రైల్వే ఉద్యోగులకు బంపర్ గిఫ్ట్.. VDA భారీగా పెంపు.. రోజుకు ఎంతంటే..?

Indian Railways VDA Hike 2026: రైల్వే శాఖ పరిధిలో పనిచేస్తున్న కాంట్రాక్ట్ కార్మికులకు కేంద్ర ప్రభుత్వం దీపావళి గిఫ్ల్ అందించింది. డియర్‌నెస్ అలవెన్స్ (VDA) రేట్లను సవరిస్తున్నట్లు రైల్వే మంత్రిత్వ శాఖ ప్రకటించింది. ఈ సవరణలు అక్టోబర్ 1 నుంచి అమల్లోకి వస్తాయని వెల్లడించింది. నిర్దేశించిన కనీస వేతన రేట్లను కచ్చితంగా పాటించేలా చూడాలని రైల్వే అధికారులను ఆదేశించింది. ఈ మేరకు కేంద్ర కార్మిక, ఉపాధి మంత్రిత్వ శాఖ పరిధిలోని లేబర్ బ్యూరో విడుదల చేసిన తాజా వీడీఏ ఉత్తర్వుల ఆధారంగా రైల్వే బోర్డు అన్ని జోనల్ కార్యాలయాలకు అధికారిక సర్క్యులర్ పంపింది. దీని ప్రకారం అక్టోబర్ 1, 2026 నుంచే ఈ పెరిగిన వేరియబుల్ డీఏ అమలులోకి వస్తుంది. రైల్వే ప్రిన్సిపల్ ఎంప్లాయర్‌గా ఉన్నందున కాంట్రాక్ట్ కార్మికులకు ఏజెన్సీలు తప్పనిసరిగా సవరించిన కనీస వేతనాల ప్రకారమే చెల్లింపులు చేయాలని.. నిబంధనలు ఉల్లంఘిస్తే కఠిన చర్యలు ఉంటాయని హెచ్చరించింది. పారిశ్రామిక కార్మికుల వినియోగదారుల ధరల సూచీ (CPI-IW) సగటు గణనీయంగా పెరిగిన నేపథ్యంలో ఈ పెంపును ఖరారు చేశారు.

వీడీఏ పెంపు నిర్ణయంతో రైల్వేలో సేవలందిస్తున్న లోడింగ్, అన్‌లోడింగ్ కార్మికులు, వాచ్ అండ్ వార్డ్ (సెక్యూరిటీ), పరిశుభ్రత, మెయింటెనెన్స్ విధుల్లో ఉండే కాంట్రాక్ట్ సిబ్బందికి నేరుగా లబ్ధి చేకూరనుంది. ప్రధాన నగరాల విభజనను బట్టి ప్రభుత్వం ఏరియాలను 'ఎ', 'బి', 'సి'గా విభజించి వేతనాలను నిర్ణయించింది. ఢిల్లీ, ముంబై, చెన్నై, హైదరాబాద్, బెంగళూరు, అహ్మదాబాద్ వంటి మెట్రో నగరాలు ఏరియా 'ఎ' కిందకు వస్తాయి.

ఏరియా 'ఎ' పరిధిలోని లోడింగ్, అన్‌లోడింగ్ కార్మికులకు రోజువారీ బేసిక్ వేతనం రూ.523 కాగా.. వీడీఏ రూ.317 కలిపి మొత్తం రోజుకు రూ.840 అందుతుంది. ఏరియా 'బి'లో బేసిక్ రూ.437, వీడీఏ రూ.267 కలిపి రూ.704గా ఉండగా.. ఏరియా 'సి'లో బేసిక్ రూ.350, వీడీఏ రూ.215 కలిపి మొత్తం రోజుకు రూ.565 కనీస వేతనంగా అందుకుంటున్నారు. మరోవైపు కన్‌స్ట్రక్షన్, మెయింటెనెన్స్ విభాగాల్లోని నైపుణ్యం లేని కార్మికులకు రోజుకు రూ.840 అందుతుండగా.. అత్యంత నైపుణ్యం కలిగిన కార్మికులకు ఏరియా 'ఎ'లో రోజువారీ వేతనం రూ.1,111 వరకు పెరిగింది.

అక్టోబర్ నుంచే ఈ ఉత్తర్వులు అమల్లోకి వచ్చినందున.. ఈ నెలకు సంబంధించిన బకాయిలతో కలిపి నవంబర్ వేతనంలో కార్మికుల ఖాతాల్లోకి నగదు జమ కానుంది. పండుగల సీజన్‌లో ప్రభుత్వం తీసుకున్న ఈ నిర్ణయంపై రైల్వే కాంట్రాక్ట్ సిబ్బంది హర్షం వ్యక్తం చేస్తున్నారు.