MCD DA Wage Hike: ఆ ఉద్యోగులకు శుభవార్త..జీతం రూ.18,000, డీఏ పెంపు..ప్రభుత్వం ఉత్తర్వులు!

MCD DA Wage Hike News: ఢిల్లీ మున్సిపల్ కార్పొరేషన్ (MCD) ప్రధాన కార్యాలయంలో శుక్రవారం నిర్వహించిన కార్యక్రమంలో పబ్లిక్ హెల్త్ సిబ్బంది వేతన పెంపును అధికారికంగా ప్రకటించారు. 'సమాన పనికి సమాన వేతనం' సూత్రం కింద దాదాపు 4,000 మంది కార్మికులకు లబ్ధి చేకూరనుంది. పే -మ్యాట్రిక్స్‌లోని 'లెవల్ 1' కనీస స్థాయి ప్రకారం వీరి మూల వేతనాన్ని రూ. 18,000గా నిర్ణయించడంతో పాటు, నిబంధనల ప్రకారం కరువు భత్యాన్ని (DA) కూడా అందించనున్నారు. ఈ నూతన వేతన విధానం అమలు వల్ల ప్రభుత్వంపై ఏటా రూ. 52 కోట్ల అదనపు ఆర్థిక భారం పడనుందని అధికారులు వివరించారు.

గతంలో ఈ ఉద్యోగులు 'డొమెస్టిక్ బ్రీడింగ్ చెకర్' (DBC) సిబ్బందిగా నియమితులయ్యారని ఎంసీడీ కమిషనర్ సంజీవ్ ఖిర్వార్ వెల్లడించారు. తదనంతర కాలంలో వీరి హోదాను 'మల్టీ-టాస్కింగ్ స్టాఫ్ (పబ్లిక్ హెల్త్)'గా మార్చడం జరిగింది. 

ముఖ్యంగా డెంగ్యూ వంటి ప్రాణాంతక కీటక జనిత వ్యాధులను కట్టడి చేసేందుకు నియమితులైన ఈ సిబ్బంది, నగరవ్యాప్తంగా నిరంతరాయంగా ఇంటింటికీ తిరుగుతూ ప్రజారోగ్య పరిరక్షణ చర్యలను చేపడుతున్నారు. దశాబ్దాలుగా వారు అందిస్తున్న సేవలను గుర్తించి, వారి సంక్షేమాన్ని కాపాడాల్సిన బాధ్యత ప్రభుత్వానిదేనని గుప్తా పేర్కొన్నారు.

ముఖ్యమంత్రి ఆమోదం, ఖాతాల్లోకి జమ..
గత బడ్జెట్‌లోనే ఈ ప్రతిపాదనను సిద్ధం చేసి ముఖ్యమంత్రి దృష్టికి తీసుకువెళ్లినట్లు మేయర్ ప్రవేశ్ వాహి తెలిపారు. ఏటా రూ. 52 కోట్ల వ్యయం అవుతుందని వివరించిన వెంటనే, సీఎం ఎటువంటి జాప్యం లేకుండా ఆమోదం తెలిపారని ఆయన స్పష్టం చేశారు. పెరిగిన వేతన మొత్తాలను ఇప్పటికే నేరుగా ఉద్యోగుల బ్యాంకు ఖాతాల్లో జమ చేయడం జరిగిందని మేయర్ పేర్కొన్నారు.

పండుగ వేళ పారిశుధ్య కార్మికుల నియామకం..
ఎంసీడీ సిబ్బంది సమస్యలను పరిష్కరించే దిశగా చర్యలు కొనసాగుతుండగానే ఈ కీలక వేతన సవరణ నిర్ణయం వెలువడింది. దీనితో పాటు, రాబోయే దీపావళి పండుగ సందర్భంగా ఢిల్లీ నగరం, వాణిజ్య మార్కెట్లలో పరిశుభ్రతను మరింత మెరుగుపరచడానికి 2,500 మంది పారిశుధ్య కార్మికులను త్వరలోనే విధుల్లోకి తీసుకోనున్నట్లు మేయర్ వెల్లడించారు.