8th Pay Commission: ఉద్యోగులకు డబుల్ బొనాంజా..జీతాలు, పెన్షన్ల పెంపుపై కీలక డిమాండ్లు!

కేంద్ర ఉద్యోగుల పెన్షన్ పెంపు

అక్టోబర్ 8న బెంగళూరులో 8వ వేతన సంఘం సభ్యులు వివిధ ఉద్యోగ, పెన్షనర్ల సంఘాలతో సమావేశమయ్యారు. ఈ సందర్భంగా పలు అంశాలపై చర్చలు జరిగాయి. కర్ణాటక పోస్టల్, టెలికమ్యూనికేషన్స్ పెన్షనర్ల సంఘం తన డిమాండ్లను కమిషన్ ముందుంచింది.

8వ వేతన సంఘం

ప్రస్తుతం కేంద్ర ప్రభుత్వ ఉద్యోగులకు కనీస బేసిక్ వేతనం రూ.18,000గా ఉంది. దీనిని రూ.69,000కు పెంచాలని పెన్షనర్ల సంఘం ప్రతిపాదించింది. ఇందుకోసం 3.833 ఫిట్‌మెంట్ ఫ్యాక్టర్‌ను అమలు చేయాలని కోరింది. ఫిట్‌మెంట్ ఫ్యాక్టర్ ఆధారంగా పాత బేసిక్ వేతనాన్ని కొత్త వేతనంగా మార్చేందుకు లెక్కలు వేస్తారు. అయితే, కొత్త వేతనాలు ఎంత పెరుగుతాయనేది 8వ వేతన సంఘం తుది సిఫారసులు, కేంద్ర ప్రభుత్వ నిర్ణయంపై ఆధారపడి ఉంటుంది.

పెన్షన్ కూడా పెంచాలని ప్రతిపాదన

ప్రస్తుతం కనీస బేసిక్ పెన్షన్ రూ.9,000గా ఉంది. దీనిని రూ.34,470కు పెంచాలని సంఘం కోరింది. అలాగే ఉద్యోగులకు ప్రస్తుతం ఇస్తున్న వార్షిక ఇంక్రిమెంట్‌ను 3 శాతం నుంచి 6 శాతానికి పెంచాలని ప్రతిపాదించింది. ఈ మార్పులు అమలైతే ఉద్యోగులకు ప్రతి సంవత్సరం జీతం పెరుగుదల ఎక్కువగా ఉండే అవకాశం ఉంటుంది. అయితే, ఈ ప్రతిపాదనలకు ఇంకా అధికారిక ఆమోదం లభించలేదు.

కుటుంబ ఖర్చుల లెక్కల్లో మార్పులు

కనీస వేతనాన్ని నిర్ణయించే విధానంలో కూడా మార్పులు చేయాలని సంఘం కోరింది. ముఖ్యంగా నిత్యావసర వస్తువుల ధరలు, ఇంటి ఖర్చులు, ఇంటర్నెట్, డిజిటల్ సేవల ఖర్చులను పరిగణనలోకి తీసుకోవాలని సూచించింది. ప్రస్తుతం వేతన లెక్కల్లో ఉపయోగిస్తున్న కుటుంబ యూనిట్ల విధానాన్ని కూడా మార్చాలని ప్రతిపాదించింది. ఉద్యోగి, జీవిత భాగస్వామి, ఇద్దరు పిల్లలు, ఆధారపడిన తల్లిదండ్రుల అవసరాలను పరిగణనలోకి తీసుకోవాలని కోరింది.

8వ పే కమిషన్ జీతాల లెక్కలు

8వ వేతన సంఘం 2025 నవంబర్ 3న ఏర్పాటు అయింది. కమిషన్ తన తుది నివేదికను 18 నెలల్లో సమర్పించాల్సి ఉంది. అంటే 2027 మే లేదా జూన్ నాటికి నివేదిక వచ్చే అవకాశం ఉంది. ఆ నివేదికను పరిశీలించిన తర్వాత కేంద్ర ప్రభుత్వం తుది నిర్ణయం తీసుకుంటుంది. అప్పటివరకు ఉద్యోగులు, పెన్షనర్లు వేచి చూడాల్సిందే. ప్రస్తుతం వినిపిస్తున్న జీతాలు, పెన్షన్ పెంపు వివరాలను ఖరారైన ప్రయోజనాలుగా భావించకూడదు.