భగ్గుమన్న 317 జీవో బాధితులు.. న్యాయం చేయాలని గాంధీ భవన్‌ ఎదుట నిరసన.. ఉపాధ్యాయుల అరెస్టు!

GO 190 Deputations Protest Gandhi Bhavan: తెలంగాణ రాష్ట్రంలోని విద్యాశాఖలో ఉపాధ్యాయుల డిప్యూటేషన్లకు (బదిలీలు/నియామకాలకు సంబంధించిన సమస్యలు) సంబంధించిన పెండింగ్ సమస్యల పరిష్కారానికి వెంటనే చర్యలు తీసుకోవాలని  జీవో 317 మరియు 190 ఉపాధ్యాయుల న్యాయ ఫోరం రాష్ట్ర టిపిసిసి అధ్యక్షుడికి వినతి పత్రం సమర్పించింది. ఈ మేరకు ఫోరం ప్రతినిధులు హైదరాబాద్‌లోని పార్టీ కార్యాలయం గాంధీ భవన్‌లో తమ అభ్యర్థనను రాతపూర్వకంగా అందజేశారు.

ఏడాది దాటినా అమలుకాని జీవో 190:
లేఖలో పేర్కొన్న వివరాల ప్రకారం.. విద్యాశాఖలో ఏడాది క్రితం జారీ చేసిన జీవో ఎంఎస్ నెం. 190 ను తక్షణమే.. సమర్థవంతంగా అమలు చేయాలని ఫోరం కోరింది. ప్రభుత్వం ఇప్పటికే ఆమోదించిన అన్ని డిప్యూటేషన్ దరఖాస్తులను పారదర్శకంగా, నిర్ణీత కాలపరిమితిలోగా పూర్తి చేసేలా సంబంధిత అధికారులకు దిశానిర్దేశం చేయాలని వారు టిపిసిసి అధ్యక్షుడిని అభ్యర్థించారు. జీవో ఇచ్చి సంవత్సరం దాటినా అమలుకు నోచుకోలేదని, వందలాది మంది ఉపాధ్యాయులు తీవ్ర మానసిక ఆందోళనలకు గురవుతున్నారని వారు ఆవేదన వ్యక్తం చేశారు.

ఉపాధ్యాయుల పట్ల పోలీసుల అమానుషం:
అయితే, తమ సమస్యలను టిపిసిసి అధ్యక్షుడి దృష్టికి తీసుకెళ్లేందుకు గాంధీ భవన్‌కు చేరుకున్న ఉపాధ్యాయుల పట్ల పోలీసులు అత్యంత అమానుషంగా ప్రవర్తించారని వారు ఆరోపిస్తున్నారు. వినతి పత్రం ఇవ్వడానికి చేరిన వందలాది మంది ఉపాధ్యాయులను ఏదో ఉగ్రవాదుల్ని ఈడ్చుకు వెళ్లినట్టు పోలీసులు తీసుకువెళ్లడం ఏంటని మండిపడుతున్నారు. చదువు చెప్పే గురువులపై ఇలాంటి ప్రవర్తన సరికాదని ఉపాధ్యాయులు ఆవేదన వ్యక్తం చేశారు. పోలీసులు తమ పట్ల అమానుషంగా ప్రవర్తించారని, ఉగ్రవాదుల్లా భావించి ఈడ్చుకెళ్లారని వారు వాపోయారు.

 ప్రభుత్వం జోక్యం చేసుకోవాలి:
ఏడాది పొడవునా పెండింగ్‌లో ఉన్న డిప్యూటేషన్ ప్రక్రియ కారణంగా ఉపాధ్యాయులు తీవ్ర మానసిక ఆందోళనలకు గురవుతున్నారని, వారి సమస్యలను పరిష్కరించడానికి కాంగ్రెస్ ప్రభుత్వం జోక్యం చేసుకోవడం చాలా అవసరమని ఫోరం రాష్ట్ర అధ్యక్షురాలు యలగొండ రత్నమాల స్పష్టం చేశారు. డిప్యూటేషన్ ప్రక్రియను పారదర్శకంగా, సమయానుకూలంగా పూర్తి చేసేలా అధికారులను ఆదేశించాలని వారు కోరారు. తమ సమస్యల పరిష్కారం కోసం టిపిసిసి అధ్యక్షుడు సానుకూలంగా స్పందిస్తారని, సాధ్యమైనంత త్వరగా అధికారులతో మాట్లాడి జీవో 190 అమలు ప్రక్రియను పూర్తి చేసేలా చొరవ చూపుతారని టీచర్స్ జస్టిస్ ఫోరం  ఆశాభావం వ్యక్తం చేసింది. పోలీసులు అమానుషంగా ప్రవర్తించినా తమ పోరాటం ఆగేది లేదని వారు స్పష్టం చేశారు. ఉపాధ్యాయుల సమస్యల పరిష్కారానికి ప్రభుత్వం వెంటనే చర్యలు తీసుకోవాలని వారు డిమాండ్ చేశారు.