Hyderabad: హైదరాబాద్‌లో పలు చోట్ల ఉరుములు, మెరుపులతో దంచికొడుతున్న వర్షం.!. భారీగా ట్రాఫిక్ జామ్..

Heavy rain lashes several places in Hyderabad: తెలంగాణలో గత కొన్ని రోజులుగా ఎల్ నినో ప్రభావంతో సామాన్య జన జీవనం అస్తవ్యస్తంగా మారిపోయింది. ఒకవైపు నిత్యవసరాల ధరలు పెరిగిపోయాయి. మరోవైపు నీటి కొరతతో జనాలు అల్లాడిపోతున్నారు. ఈ క్రమంలో హైదరాబాద్ లో వాతావరణం ఒక్కసారిగా మారిపోయింది. దాదాపు నెల రోజుల తర్వాత హైదరాబాద్ లో పలుచోట్ల భారీ వర్షం కురిసింది. 

లింగం పల్లి, కాప్రా, ఘట్కేసర్,చందానగర్,దిల్ సుఖ్ నగర్, హయత్ నగర్, జుబ్లీహిల్స్, బంజారా హిల్స్, రాయదుర్గం, షేక్ పేట్, తుర్కయాంజాల్, కాప్రా, కీసర, నాగారం,టోలీ చౌకీ, లంగర్ హౌస్, కార్వాన్, రాజేంద్ర నగర్, యూసుఫ్ గూడా, వెంగళరావునగర్,  జూబ్లిహిల్ వంటి పలు ప్రాంతాల్లో భారీ వర్షం కురిసింది.  దీంతో రోడ్లపై నీరుచేరడం వల్ల ట్రాఫిక్ కు  అంతరాయం ఏర్పడింది. సాయంత్రం కావడంతో ఆఫీసులు,స్కూళ్లు, కాలేజీల నుంచి వచ్చే వారంతా వర్షం వల్ల తీవ్ర అవస్థలు పడుతున్నారు. 

మరోవైపు జీహెచ్ఎంసీ, హైడ్రా సిబ్బంది, ట్రాఫిక్ పోలీసులు రంగంలోకి నీళ్లను రోడ్ల మీద నిలవకుండా మ్యాన్ హోళ్లను క్లియర్ చేస్తున్నారు. ఇప్పటికే హైదరాబాద్ లో  రాబోయే 8 నెలల పాటు  నీళ్ల కష్టాలు తప్పవని జలమండలి ప్రకటించిన కొన్ని గంటల్లోనే వర్షం పడటం పల్ల హైదరాబాద్ వాసులు మాత్రం ఒకింత ఆనందం వ్యక్తం చేస్తున్నారు. రానున్న రెండు గంటల్లో మరిన్ని ప్రాంతాలకు వర్షం విస్తరించే అవకాశం ఉందని వాతావరణ శాఖ అంచనా వేస్తుంది.