Pulivarthi Sudha Reddy Warning: "ఈ రోజంతా నీతోనే ఉంటా" వైసీపీ నేత చెవిరెడ్డి భాస్కర్ రెడ్డికి టీడీపీ ఎమ్మెల్యే భార్య వార్నింగ్..

Pulivarthi Sudha Reddy Warning Video: ఆంధ్రప్రదేశ్ రాష్ట్రం తిరుపతి రూరల్ ప్రాంతంలో ఎంపీటీసీ, జడ్పీటీసీ ఎన్నికల పోలింగ్ సందర్భంగా తెలుగుదేశం, వైకాపా నేతల మధ్య తీవ్ర ఉద్రిక్త వాతావరణం నెలకొంది. వైకాపా అభ్యర్థికి జనరల్ ఏజెంట్‌గా వ్యవహరిస్తున్న మాజీ ఎమ్మెల్యే చెవిరెడ్డి భాస్కర్ రెడ్డి పోలింగ్ కేంద్రాల పరిశీలనకు వెళ్లారు. ఈ క్రమంలో ఉదయం మంగళం ప్రాంతంలోని పోలింగ్ కేంద్రం వద్ద చంద్రగిరి ఎమ్మెల్యే పులివర్తి నానిని చెవిరెడ్డి అడ్డుకోవడంతో ఇరువర్గాల మధ్య గొడవలు మొదలయ్యాయి.

మరోవైపు తెదేపా అభ్యర్థికి జనరల్ ఏజెంట్‌గా వ్యవహరిస్తున్న పులివర్తి సుధా రెడ్డి (ఎమ్మెల్యే పులివర్తి నాని సతీమణి) చెవిరెడ్డి ఉన్న పోలింగ్ కేంద్రం వద్దకు చేరుకున్నారు. చెవిరెడ్డి కాన్వాయ్‌ను సుధా రెడ్డి తన వాహనంతో వెంబడించారు. ఉదయం నుంచి చెవిరెడ్డి ఎక్కడికి వెళ్తే, సుధా రెడ్డి కూడా అక్కడికే వెళ్లడం విశేషం.

ఈ క్రమంలో చెవిరెడ్డి భాస్కర్ రెడ్డిని ఉద్దేశించి సుధా రెడ్డి తీవ్రస్థాయిలో వార్నింగ్ ఇచ్చారు. తెదేపా నేతలను రెచ్చగొట్టే ప్రయత్నాలు చేయవద్దని, అనవసరంగా గొడవలు సృష్టిస్తే సహించేది లేదని స్పష్టం చేశారు. "నేను నీకు ఎస్కార్ట్‌.. ఈ రోజు అంతా నీ వెంటే ఉంటాను అన్న. నిన్ను ఒంటరిగా వదిలేస్తే గొడవలు చేస్తావు. ఏమైనా నాన్సెన్స్ క్రియేట్ చేస్తే నీకు, నాకు నేరుగా ఉద్యమమే" అంటూ వ్యాఖ్యానించారు. రోజంతా ఆయన వెంటే ఉంటానని, అప్పుడే ఎలాంటి గొడవలు జరగవని ఆమె తెలిపారు.

అయితే చంద్రగిరి అధికార టీడీపీ ఎమ్మెల్యే పులివర్తి నాని భార్య సుధారెడ్డి. సుధా రెడ్డి వ్యవహరించిన ఈ తీరు తిరుపతి రూరల్ ఎన్నికల వాతావరణాన్ని మరింత వేడెక్కించగా, ఇందుకు సంబంధించిన వీడియో ప్రస్తుతం సోషల్ మీడియాలో తీవ్రంగా వైరల్ అవుతోంది.