Pulivendula MPTC ZPTC Elections: ఎంపీటీసీ, జడ్పీటీసీ ఎన్నికల వేళ పులివెందులలో ఉద్రిక్తత..రాళ్లు, బీరు సీసాలతో దాడులు!

Pulivendula MPTC ZPTC Elections 2026: వైఎస్‌ఆర్‌ కడప జిల్లా పులివెందుల నియోజకవర్గ పరిధిలో ఎంపీటీసీ, జెడ్పీటీసీ పోలింగ్ ప్రక్రియ ఉద్రిక్తతల మధ్య ముగిసింది. పోలింగ్ ప్రారంభమైన సమయం నుంచే వివిధ గ్రామాల్లో వైసీపీ, టీడీపీ శ్రేణుల మధ్య తీవ్ర స్థాయిలో విభేదాలు బయటపడటంతో స్థానికులలో భయాందోళనలు నెలకొన్నాయి.

అధికార తెలుగుదేశం పార్టీ (టీడీపీ), ప్రతిపక్ష వైఎస్సార్ కాంగ్రెస్ పార్టీ (వైసీపీ) వర్గాల నడుమ పలు గ్రామాల్లో పరస్పర ఘర్షణలు, రాళ్లు, సీసాలతో దాడులు జరిగాయి. ఆర్. తుమ్మలపల్లిలో జరిగిన దాడిలో కృష్ణారెడ్డి అనే వైసీపీ కార్యకర్త తీవ్రంగా గాయపడగా, పార్నపల్లె, గుండ్లకుంట, ఎర్రిపల్లి గ్రామాల్లో ఏజెంట్ల వివాదాలు, తోపులాటలు జరిగాయి.

వివిధ గ్రామాల్లో చోటుచేసుకున్న ఘటనలు..
ఆర్. తుమ్మలపల్లి: పులివెందుల మండలంలోని ఈ గ్రామంలో ఇరువర్గాల మధ్య చిన్నగా మొదలైన వివాదం చినికి చినికి గాలివానలా మారింది. ఇరుపక్షాలు రాళ్లు, సీసాలతో దాడులకు తెగబడటంతో కృష్ణారెడ్డి అనే వైసీపీ కార్యకర్త తీవ్రంగా గాయపడ్డారు.

పార్నపల్లె (లింగాల మండలం): పోలింగ్ కేంద్రం వద్ద ఏజెంట్ల అనుమతిపై వివాదం రేగింది. తమ ఏజెంట్లను లోనికి రానివ్వడం లేదని వైసీపీ వర్గాలు ఆందోళనకు దిగాయి. ఈ విషయం తెలిసి అక్కడికి బయలుదేరిన కడప ఎంపీ అవినాష్ రెడ్డిని పోలీసులు మార్గమధ్యంలోనే నిలిపివేశారు.

గుండ్లకుంట (పెద్దముడియం మండలం) గ్రామంలో వైసీపీ ఎమ్మెల్సీ రామసుబ్బారెడ్డి తమ ఏజెంట్లను బయటకు పంపించారని టీడీపీ నాయకులు ఆరోపించడంతో ఇరువర్గాల నడుమ తీవ్ర తోపులాట జరిగింది. పోలీసులు తక్షణమే స్పందించి గొడవను సద్దుమణిగించారు. అలాగే ఎర్రిపల్లిలో పోలీసులు ఓటర్లను నిలిపివేస్తున్నారనే వార్తలతో ఇక్కడ కొంతసేపు ఆందోళనకర వాతావరణం ఏర్పడింది.

పోలీసుల పటిష్ఠ భద్రత
వరుస అశాంతి సంఘటనల నేపథ్యంలో పోలీస్ యంత్రాంగం ముందస్తు భద్రతా చర్యలు చేపట్టింది. సమస్యాత్మక గ్రామాల్లో అదనపు బలగాలను దించి నిఘా పెంచింది. శాంతిభద్రతల పరిరక్షణకు ఉన్నతాధికారులు పరిస్థితిని నిరంతరం పర్యవేక్షిస్తున్నారు.