Cyclone Arnab LIVE: యానాం వద్ద తీరం దాటిన అర్నబ్.. రాష్ట్రంలో తుఫాన్ విలయం..!

AP Rains Live Updates: అర్నబ్ తుఫాన్ అంబేద్కర్ కోనసీమ జిల్లాలో బీభత్సం సృష్టించింది. అరటి రైతుల కష్టంపై ప్రకృతి పగబట్టినట్లుగా విరుచుకుపడింది. ఆత్రేయపురం, రావులపాలెం ప్రాంతాల్లో  వేలాది ఎకరాల్లో అరటి చెట్లు నిలువునా నేలకొరిగాయి. ఎకరానికి సుమారు రెండు లక్షల వరకూ పెట్టుబడి పెట్టిన  రైతులు పూర్తిగా కుదేలయ్యారు‌.‌ 

AP Rains Live Updates: అర్నబ్ తుపాన్ ప్రభావం ఉన్న మునిసిపల్ కమిషనర్లతో టెలి కాన్ఫరెన్స్ నిర్వహించిన మంత్రి నారాయణ

తుపాన్ ప్రభావంతో పట్టణాల్లో జన జీవనానికి ఇబ్బంది లేకుండా ఎప్పటికప్పుడు చర్యలు తీసుకోవాలి

రోడ్లపై చెట్లు కూలిన చోట వెంటనే తొలగించేలా తగిన యంత్రాలతో సిబ్బంది అలెర్ట్ గా ఉండాలి

ఈదురు గాలులతో ప్రమాదకర హోర్డింగ్ ల వద్ద తగిన జాగ్రత్తలు తీసుకోవాలని సూచించిన మంత్రి

రోడ్లుపై ,డ్రెయిన్ లలో నీరు నిలువకుండా ఇంజినీరింగ్ సిబ్బంది తక్షణ చర్యలు చేపట్టాలి

వర్షం కారణంగా పారిశుధ్య సమస్యలు, నీరు కలుషితం కాకుండా జాగ్రత్తలు తీసుకోవాలి

AP Rains Live Updates:

• అతి తీవ్ర తుపాన్‌ నుంచి తీవ్ర తుపాన్‌గా బలహీనపడిన అర్నబ్‌
• ఈ ఉదయం 8:30 గంటలకు తీవ్ర తుపాన్‌గా మారినట్లు వాతావరణ శాఖ ప్రకటన
• ఆంధ్రప్రదేశ్‌–యానాం తీరాన్ని దాటిన తుపాన్‌
• తెల్లవారుజామున 2 గంటల నుంచి ఉదయం 8 గంటల మధ్య తీరందాటిన తుపాన్
• యానాంకు నైరుతి దిశగా తీరాన్ని దాటిన అర్నబ్‌
• నర్సాపురానికి తూర్పు ఈశాన్యంగా 20 కిలోమీటర్ల దూరంలో తీరాన్ని దాటిన తుపాన్ కేంద్రం
• యానాంకు నైరుతిగా 40 కిలోమీటర్లు.. కాకినాడకు నైరుతిగా 60 కిలోమీటర్ల దూరంలో తుపాన్ కేంద్రం
• తీరం దాటే సమయంలో గంటకు 125–135 కిలోమీటర్ల వేగంతో పెనుగాలులు
• గరిష్ఠంగా గంటకు 150 కిలోమీటర్ల వేగంతో ఈదురుగాలులు వీచినట్లు వాతావరణ శాఖ వెల్లడి
• తుపాన్ కేంద్ర ప్రాంతం పూర్తిగా భూభాగంలోకి ప్రవేశించడంతో తీరం దాటే ప్రక్రియ పూర్తయినట్లు అధికారుల ప్రకటన
• తుపాన్ ప్రభావిత ప్రాంతాల్లో ప్రజలు అప్రమత్తంగా ఉండాలి.. అధికారుల సూచనలు పాటించాలి

AP Rains Live Updates: పశ్చిమగోదావరి జిల్లా తీర ప్రాంత మండలాలైన నరసాపురం, మొగల్తూరులో అర్నాబ్ తుఫాన్ బీభత్సం సృష్టించింది. భీకర ఈదురుగాలుల ధాటికి ఇళ్లు దెబ్బతిన్నాయి. భారీ వృక్షాలు నేలకొరిగాయి.. విద్యుత్ స్తంభాలు కూలిపోయాయి.. కొబ్బరి, తాటి చెట్లు సైతం నేలమట్టమయ్యాయి. గంటకు 140 నుంచి 150 కిలోమీటర్ల వేగంతో గాలులు వీచినట్లు సమాచారం. తుఫాన్ దెబ్బకు పలు గ్రామాల్లో జనజీవనం అస్తవ్యస్తంగా మారింది. ఇళ్ల పైకప్పులు కూలిపోవడంతో పలువురు నిరాశ్రయులయ్యారు. విద్యుత్ స్తంభాలు పడిపోవడంతో పలు ప్రాంతాలు అంధకారంలో చిక్కుకున్నాయి. తీర ప్రాంతంపై తుఫాన్ విరుచుకుపడటంతో నరసాపురం, మొగల్తూరు మండలాల్లో పరిస్థితి తీవ్రంగా మారింది.

భీకర గాలుల ధాటికి భారీ వృక్షాలు, కొబ్బరి చెట్లు, తాటి చెట్లు కూలిపోయాయి. పలు చోట్ల విద్యుత్ స్తంభాలు నేలకొరగడంతో విద్యుత్ సరఫరాకు అంతరాయం ఏర్పడింది. ఇళ్ల పైకప్పులు దెబ్బతినడంతో బాధితులు తలదాచుకునేందుకు ఆశ్రయం లేక ఇబ్బందులు ఎదుర్కొంటున్నారు. తూర్పుతాళ్లు, సీతారాంపురం, మర్రితిప్పతో పాటు పలు గ్రామాల్లో రహదారులపై చెట్లు విరిగిపడటంతో రాకపోకలకు అంతరాయం ఏర్పడింది. అధికారులు, సహాయక బృందాలు రంగంలోకి దిగి ప్రొక్లైనర్ల సాయంతో చెట్లను తొలగిస్తూ రహదారులను పునరుద్ధరిస్తున్నాయి.
మరోవైపు తుఫాన్ బాధితులను నరసాపురం పట్టణంలోని మిషన్ హైస్కూల్ తో పాటు నియోజవర్గంలో 24సా పునరావాస కేంద్రాలకు తరలించి భోజన సదుపాయాలు కల్పిస్తున్నారు. తుఫాన్ ప్రభావిత ప్రాంతాల్లో నష్టాన్ని అంచనా వేసి, నిరాశ్రయులైన కుటుంబాలకు తక్షణ సాయం అందించాలని బాధితులు కోరుతున్నారు.