Abhijeet Dipke Arrest: అభిజీత్ దీప్కే అరెస్ట్ కోసం మహిళా పోలీసులే ఎందుకొచ్చారు? దీని వెనుక పక్కా ప్లాన్ ఉందా?

Abhijeet Dipke Arrested By Women Cops: ఢిల్లీలోని ఇందిరా గాంధీ ఇంటర్నేషనల్ విమానాశ్రయంలో ఎయిర్ ఇండియా విమానం ల్యాండ్ కాగానే ఢిల్లీ పోలీసులు నేరుగా విమానంలోకి ప్రవేశించారు. జంతర్ మంతర్ వద్ద నిరసన కార్యక్రమంలో పాల్గొనేందుకు వచ్చిన కాక్రోచ్ జనతా పార్టీ (సీజేపీ) ముఖ్య నాయకులు అభిజీత్ దీప్కే, సౌరవ్ దాస్, అశుతోష్ రాంకాలతో పాటు మరికొందరిని పోలీసులు వెంటనే అదుపులోకి తీసుకున్నారు.

ఈ నిర్బంధం సమయంలో సీజేపీ నాయకుడు అభిజీత్ దీప్కే తన మొబైల్ ఫోన్‌లో వీడియో తీస్తూ ప్రభుత్వ చర్యలను తీవ్రంగా ఖండించారు. పోలీసుల తీరును నియంతృత్వంగా అభివర్ణిస్తూ 'ఇంక్విలాబ్ జిందాబాద్', 'భారత్ మాతాకీ జై' అంటూ బిగ్గరగా నినాదాలు చేశారు. అయితే, రంగంలోకి దిగిన మహిళా పోలీసులు ఎంతో ఓర్పు, సమన్వయంతో వారిని శాంతపరిచి, విమానం నుంచి సురక్షితంగా కిందకు దించి వేర్వేరు ప్రాంతాలకు తరలించారు.

మహిళా పోలీసుల మోహరింపు వెనుక వ్యూహం..
విమానం లోపలికి పురుష పోలీసులకు బదులుగా మహిళా పోలీసు అధికారులను పంపడం వెనుక ఒక కచ్చితమైన వ్యూహాత్మక ప్రణాళిక ఉంది. విమానంలోని మార్గాలు, సీట్ల మధ్య ప్రదేశం అత్యంత ఇరుకుగా ఉంటుంది. అటువంటి ప్రదేశంలో పురుష పోలీసులను పంపిస్తే తోపులాటలు, ఘర్షణలు జరిగి తీవ్ర ఉద్రిక్తత నెలకొనే ప్రమాదం ఉందని పోలీసులు అంచనా వేశారు.

మరోవైపు, జులై 20న జరిగిన విద్యార్థుల ఆందోళన సందర్భంగా పురుష పోలీసులు మహిళా నిరసనకారులపై దాడి చేశారని సీజేపీ గతంలో ఆరోపించింది. ఈ నేపథ్యంలో సీజేపీకి మద్దతుగా ఉన్న యువత, మహిళల దృష్టిలో తమ ప్రతిష్ట దెబ్బతినకుండా చూసుకోవడానికి, సోషల్ మీడియాలో ప్రతికూల ప్రచారం రాకుండా అడ్డుకోవడానికి ఢిల్లీ పోలీసులు ఈ వ్యూహాన్ని ఎంచుకున్నారు.

రాజధాని వ్యాప్తంగా తీవ్ర భద్రతా ఆంక్షలు..
ప్రధాన ఎన్నికల కమిషనర్ (CEC) జ్ఞానేష్ కుమార్ తక్షణమే రాజీనామా చేయాలని డిమాండ్ చేస్తూ సీజేపీ ఈ భారీ నిరసనకు పిలుపునిచ్చింది. ఈ ఆందోళన తీవ్రరూపం దాల్చకుండా ముందస్తు జాగ్రత్త చర్యగా ప్రముఖ యూట్యూబర్ ధ్రువ్ రాఠీ, సీజేపీ లీగల్ సెల్ హెడ్ రత్నా సింగ్‌లతో సహా రాజధాని అంతటా దాదాపు 400 మందికి పైగా నిరసనకారులను పోలీసులు ముందస్తుగా అదుపులోకి తీసుకున్నారు.

ఏలాంటి అవాంఛనీయ సంఘటనలు జరగకుండా దేశ రాజధానిని అత్యంత కట్టుదిట్టమైన భద్రతా వలయంలోకి తీసుకువచ్చారు. భద్రతా కారణాల దృష్ట్యా 45 మెట్రో స్టేషన్ల ద్వారాలను మూసివేయడమే కాకుండా, 250కి పైగా రైళ్లను రద్దు చేశారు. నగరమంతటా 23,000 మందికి పైగా పారామిలిటరీ బలగాలను రంగంలోకి దించి, ముందస్తు నిర్బంధాల ద్వారా పరిస్థితిని పోలీసులు తమ పూర్తి నియంత్రణలోకి తెచ్చుకున్నారు.