దసరా వేడుకల్లో తీవ్ర ఉద్రిక్తత.. పల్లా రాజేశ్వర్ రెడ్డి vs కాంగ్రెస్ నాయకులు.. పోలీసుల లాఠీఛార్జ్!

Clash at Jangaon Dasara Celebrations: తెలంగాణ వ్యాప్తంగా దసరా వేడుకలు ఘనంగా నిన్న జరిగాయి. దసరా రోజున జమ్మి చెట్టును సందర్శించడం, రావణ దహనం వంటి కార్యక్రమాలు నిర్వహిస్తారు. అయితే, జనగామ జిల్లా బతుకమ్మ కుంట వద్ద దసరా వేడుకలు రాజకీయ ఉద్రిక్తతలకు దారితీశాయి. మున్సిపల్ ఆధ్వర్యంలో జరిగిన రావణ దహన కార్యక్రమానికి ఎమ్మెల్యే పల్లా రాజేశ్వర్ రెడ్డి తన బృందంతో చేరుకోగా, కాంగ్రెస్ నియోజకవర్గ ఇన్‌ఛార్జీ కొమ్మూరి ప్రతాప్ రెడ్డి, ఆయన కుమారుడు కొమ్మూరి ప్రశాంత్ రెడ్డి కూడా అక్కడికి చేరుకున్నారు. దీంతో ఇరు వర్గాలు ఒకరినొకరు ఎదురు పడటంతో వ్యతిరేక నినాదాలు చేసుకున్నారు. వేదిక వద్ద ప్రోటోకాల్ పాటించడం లేదని ఎమ్మెల్యే పల్లా రాజేశ్వర్ రెడ్డి అభ్యంతరం వ్యక్తం చేయగా, కాంగ్రెస్ శ్రేణులు ఆయనకు వ్యతిరేకంగా నినాదాలు చేశాయి. దీనివల్ల ఇరువర్గాల మధ్య వాగ్వాదం పెరిగి, తోపులాట వరకు వెళ్లింది.

వేడుకల మధ్య ఇలాంటి అనుకోని సంఘటనలు జరగడంతో పరిస్థితి ఉద్రిక్తంగా మారి, పోలీసులు రంగంలోకి దిగాల్సి వచ్చింది. కార్యకర్తలను చెదరగొట్టే క్రమంలో పోలీసులు లాఠీ ఛార్జ్ కూడా చేశారు. దీంతో అక్కడ కొంత సమయం పాటు ఉద్రిక్త వాతావరణం నెలకొంది. ప్రోటోకాల్ వివాదంపై బీఆర్ఎస్ శ్రేణులు నిరసన వ్యక్తం చేయగా, ఎమ్మెల్యే పల్లా రాజేశ్వర్ రెడ్డి కూడా భారీ గేట్ల వెలుపల నిరసన తెలిపారు.

పండగ సమయంలో ప్రజలు ఉత్సాహంగా జరుపుకోవాల్సిన వేళ, రాజకీయ నాయకులు, కార్యకర్తల పెద్ద సంఖ్యలో పాల్గొనడం వల్ల ఇలాంటి వివాదాస్పద పరిస్థితులు ఏర్పడ్డాయి. లాఠీ ఛార్జ్ జరిగిన తర్వాత ఎవరైనా గాయపడ్డారా లేదా ఎవరిపై కేసులు నమోదు చేశారనే అధికారిక సమాచారం ఇంకా వెలువడలేదు. ఈ ఘటనపై నాయకుల స్పందన కీలకంగా మారనుంది. జనగామలో జరిగిన ఈ సంఘటన రాజకీయంగా చర్చనీయాంశం కావడమే కాకుండా, అసలు వివాదానికి కారణం ఏమిటి? పోలీసులు ఎలాంటి చర్యలు తీసుకున్నారు అనే ప్రశ్నలు కూడా తలెత్తుతున్నాయి. ఇక కుటుంబ సభ్యులతో దసరా వేడుకలు జరుపుకొందామని వచ్చిన ప్రజలు లాఠీ ఛార్జీ జరగడంతో ఒక్కసారిగా భయాందోళనకు గురయ్యారు. పలువురు అక్కడి నుంచి వెళ్లిపోయారు.

Read Also:  హైదరాబాద్‌లో జింక మాంసం కలకలం.. ముగ్గురు అరెస్ట్, బుల్లెట్లు స్వాధీనం..