తెలంగాణలో కరువు తీరా కుమ్మేస్తోన్న వర్షం..

Telangana Rains: అవును కరువుతో అల్లాడిపోతున్న తెలంగాణపై వరుణుడు కరుణ చూపిస్తున్నాడు. మొన్న హైదరాబాద్ సహా పలు జిల్లాల్లో భారీ వర్షాలు కురిసాయి. దాంతో ఎన్నో రోజుల తర్వాత భాగ్యనగరం వ్యాప్తంగా భారీ వర్షాలు కురిసాయి. నిన్న  కూడా పలు ప్రాంతాల్లో ఓ మోస్తరుగా వర్షాలు కురిసాయి. ఇక ఉమ్మడి కరీంనగర్, నిజామాబాద్, మెదక్ జిల్లాల్లోని పలు ప్రాంతాల్లో వర్షాలు దంచి కొట్టాయి.

తిమ్మాపూర్‌లో అత్యధిక వర్షపాతం.. 

నిన్న సాయంత్రం 6 గంటల వరకు కరీంనగర్ జిల్లా తిమ్మాపూర్‌లో 57.5 మిల్లిమీటర్ల వర్షం కురిసింది. మహబూబా బాద్ జిల్లా కేసముద్రంలో 35.5 మిల్లిమీటర్లు, కామారెడ్డి నాగిరెడ్డి పేటలో 35.3 మిల్లీమీటర్లు, మహబూబా బాద్ ఆమన్‌గల్‌లో 33.5 మిల్లీ మీటర్లు..  సిద్దిపేట జిల్లా తుక్కాపూర్ లో 32 మిల్లీ మీటర్లు , కామారెడ్డి జిల్లా బంజారాతండాలో 31 మిల్లిమీటర్లు, ములుగు జిల్లా వెంకటాపూర్ లో 28 మిల్లిమీటర్ల వర్షం కురిసింది. నిన్న రాత్రి  వికారాబాద్, సంగారెడ్డి, నాగర్ కర్నూల్, ఖమ్మం, భద్రాద్రి కొత్తగూడెం జిల్లాల్లో భారీగా వర్షాలు కురిసాయి.  

రాబోయే 72 గంటల పాటు వర్షాలు.. 
ఇక  హైదరాబాద్‌లో మేడ్చల్ మల్కాజ్‌గిరిలోని గండిమైసమ్మ, జీహెచ్ఎంసీ పరిధిలోని ముషీరాబాద్‌లో ఓ మోస్తరు వర్షాలు పడ్డాయి. మొత్తంగా రాబోయే 48 గంటల నుంచి 72 గంటల మధ్య భారీ నుంచి అతి భారీ వర్షాలు కురిసే అవకాశాలున్నాయి. ముఖ్యంగా  ఉత్తర తెలంగాణలోని పలు జిల్లాలకు వాతావరణ శాఖ ఎల్లో అలర్ట్ జారీ చేసింది. ప్రజలు అప్రమత్తంగా ఉండాలని సూచించారు.