బెండకాయ తింటే కొలెస్ట్రాల్ తగ్గుతుందా? గ్యాస్ట్రోఎంటరాలజిస్ట్ ఏం చెబుతున్నారు?

Bhindi for Cholesterol: బెండకాయ ఒక ఆరోగ్యకరమైన కూరగాయ. దీనిని భిండి అని కూడా పిలుస్తారు. మన రోజువారీ ఆహారంలో బెండకాయ కీలక పాత్ర పోషిస్తుంది. దీనితో ఫ్రైలు, చారు వంటి రకరకాల వంటకాలు తయారు చేసుకోవచ్చు. ఇవి అద్భుతమైన రుచిని కలిగి ఉంటాయి. క్రమం తప్పకుండా డైట్‌లో బెండకాయను చేర్చుకోవడం వల్ల అనేక ఆరోగ్య ప్రయోజనాలు అందుతాయి. ఇందులో నీటిలో కరిగే ఫైబర్ ఉంటుంది, దీనిని 'మ్యూసిలేజ్' అని కూడా పిలుస్తారు. దీని జిగట స్వభావం వల్ల ఇది కరిగే పీచు పదార్థంగా మారుతుంది, ఇది జీర్ణక్రియకు, పేగుల కదలికలకు ఎంతో మేలు చేస్తుంది. మన గట్ ఆరోగ్యానికి ఇది ఎంతో కీలకం. అంతేకాకుండా, కొలెస్ట్రాల్‌ను నియంత్రించడంలో కూడా ఈ కూరగాయ సహాయపడుతుందని గ్యాస్ట్రోఎంటరాలజిస్టులు సూచిస్తున్నారు. దీనిపై డాక్టర్ సౌరబ్ సతీష్ వివరణ ఇచ్చారు.

డాక్టర్ తెలిపిన వివరాల ప్రకారం, బెండకాయలోని మ్యూసిలేజ్ అనే కరిగే ఫైబర్ జెల్ లాగా మారుతుంది. ఇది జీర్ణ వ్యవస్థను ఆరోగ్యంగా ఉంచడమే కాకుండా, క్రమం తప్పకుండా పేగుల కదలికలకు సహాయపడుతుంది. దీర్ఘకాలిక మలబద్ధక సమస్యలకు ఇది ఒక మంచి పరిష్కారం కావచ్చు.

బెండకాయలోని ఫైబర్ ప్రేగులలోని సూక్ష్మజీవులకు సహాయపడుతుంది. బెండకాయను క్రమబద్ధంగా తీసుకోవడం వల్ల కాలేయం కొలెస్ట్రాల్‌ను ఉపయోగించి బైల్ యాసిడ్స్‌ను తయారు చేస్తుంది. ఇది కొవ్వుల జీర్ణక్రియకు తోడ్పడుతుంది. బైల్ యాసిడ్స్ శరీరం నుండి తొలగిపోయినప్పుడు, కాలేయం మళ్ళీ కొత్తగా కొలెస్ట్రాల్‌ను ఉపయోగించి వాటిని తయారు చేయాల్సి వస్తుంది. ఈ ప్రక్రియ ద్వారా ఈ పీచు పదార్థం రక్తంలోని కొలెస్ట్రాల్ స్థాయిలను తగ్గించడంలో కీలక పాత్ర పోషిస్తుంది.

అయితే, కేవలం బెండకాయ మాత్రమే కొలెస్ట్రాల్‌ను తగ్గిస్తుందని చెప్పడానికి ఎటువంటి పరిశోధనలు లేవు. మీరు తీసుకునే ఆహారపు అలవాట్లు కూడా ఇందులో ముఖ్య పాత్ర పోషిస్తాయి. ఇలాంటి ఆరోగ్యకరమైన ఆహారం తీసుకుంటూనే, జంక్ ఫుడ్ వంటి వాటికి అలవాటు పడితే కొలెస్ట్రాల్ మళ్ళీ పెరిగే అవకాశం ఉంది. దీనితో పాటు క్రమం తప్పకుండా వ్యాయామం చేయడం కూడా చాలా అవసరం. మీ రోజువారీ ఆహారంలో వారానికి కనీసం ఒకటి రెండు సార్లు బెండకాయను చేర్చుకోండి, తద్వారా దాని ప్రయోజనాలు మీ శరీరానికి అందుతాయి.

బెండకాయ ముక్కలను రాత్రంతా గ్లాసు నీటిలో నానబెట్టి, ఉదయాన్నే ఆ నీటిని తాగడం గురించి మనకు తెలుసు. సోషల్ మీడియాలో కూడా మనం చూస్తున్నట్లుగా, ఇందులోని ఫైబర్ జెల్ రక్తంలో చక్కెర స్థాయిలు హఠాత్తుగా పెరగకుండా రోజంతా నియంత్రణలో ఉంచుతుంది. చాలామంది ఈ పద్ధతిని అనుసరిస్తుంటారు.(Disclaimer: ఈ కథనంలో పేర్కొన్న విషయాలు, సూచనలు కేవలం పాఠకుల అవగాహన, ప్రాథమిక సమాచారం కోసం మాత్రమే అందించాం. ఇది ఎలాంటి పరిస్థితుల్లోనూ వైద్యుల సలహా, నిర్ధారణ లేదా చికిత్సకు ప్రత్యామ్నాయం కానేరదు. ఆరోగ్యానికి సంబంధించిన ఏవైనా సందేహాలు, సమస్యలు ఉన్నా లేదా కొత్త జీవనశైలి మార్పులు పాటించాలన్నా ముందుగా సంబంధిత వైద్యులను సంప్రదించండి).