డివైన్ ట్రాప్, నీకు తెలియకుండానే నువ్వు ఆడుతున్న గేమ్ లో పావుగా మారొద్దు..!!

Motivational story: ఒక పల్లెటూరిలో ఒక రైతు ఉండేవాడు. తన పొలం చివరన చాలా ఏళ్ల క్రితం పాడుబడిన ఒక పెద్ద బావి ఉండేది.
ఒక రోజు అతని పొలంలో ఒక పంది చనిపోయింది. దాన్ని ఎక్కడ పూడ్చాలో తెలియక, దాన్ని తీసుకెళ్లి ఆ పాడుబడిన బావిలో పడేశాడు.
రెండు రోజుల తర్వాత ఆ బావి నుంచి మాంసం వాసన చుట్టుపక్కల పొలాలన్నిటికీ వ్యాపించింది. ఆ వాసనకు వందల కొద్దీ ఎలుకలు ఆ బావి వైపు పరుగెత్తుకుంటూ వచ్చాయి. ఒక్కొక్కటిగా బావిలోకి దూకేశాయి. లోపల వాటికి కావాల్సినంత ఆహారం. తినడం, పడుకోవడం, హాయిగా తిరగడం. వాటికి అదే స్వర్గంలా అనిపించింది.
కానీ ఆ స్వర్గం ఎక్కువ రోజులు నిలవలేదు.
కొన్ని రోజుల్లోనే ఆ పంది మాంసం మొత్తం అయిపోయింది. ఇప్పుడు ఆకలి మొదలైంది. ఎలుకలన్నీ బయటికి వెళ్లాలని చూశాయి. కానీ బావి గోడలు నునుపుగా, నిటారుగా ఉన్నాయి. ఎంత ప్రయత్నించినా ఒక్క ఎలుక కూడా పైకి ఎక్కలేకపోయింది.
ఆకలి పెరిగింది. ఆకలి పెరిగే కొద్దీ స్నేహం పోయింది. పక్కనే ఉన్న తోటి ఎలుకే ఇప్పుడు వాటికి ఆహారంలా కనిపించసాగింది.
మొదట ఒకటి, తర్వాత రెండు... ఎలుకలు ఒకదాన్నొకటి చంపుకుని తినడం మొదలుపెట్టాయి. రోజులు గడిచే కొద్దీ బావిలో శవాలే మిగిలాయి.
చివరికి బావిలో ఒక్క ఎలుక మాత్రమే మిగిలింది.
ఆ ఎలుక ఇక సాధారణ ఎలుక కాదు. నెలల పాటు తోటి ఎలుకల మాంసం తిని, పోరాడి, బతికి బయటపడిన ఎలుక. దాని కళ్లు ఎర్రగా మారిపోయాయి. దాని మనసులో ఒకే ఒక్క ఆలోచన - చంపడం, తినడం, గెలవడం.
ఆ సమయంలోనే ఆ రైతు మళ్ళీ ఆ బావి దగ్గరకు వచ్చాడు. బావిలోకి ఒక తాడు వేశాడు. ఆ ఎలుక ఆ తాడును గట్టిగా పట్టుకుని పైకి వచ్చేసింది.
కానీ పైకి వచ్చాక కూడా అది మారలేదు. పొలంలో కనిపించిన ప్రతి ఎలుకనూ వెంటాడి, వేటాడి తినడం మొదలుపెట్టింది. బావిలో నేర్చుకున్న పోరాటమే దానికి జీవితం అయిపోయింది.

ఇదే డివైన్ ట్రాప్

మన జీవితంలో కూడా ఇలాంటి బావులు చాలా ఉంటాయి.
పైనున్న కొంతమంది ఒక కొత్త కథను తయారుచేసి మన మధ్యకు వదులుతారు.
"వాడు నీ శత్రువు"
"వీళ్ల వల్లే నీకు ఉద్యోగం రాలేదు"
"వాళ్ల కులం వాళ్లే నీకు అడ్డుపడుతున్నారు"
"ఆ మతం వాళ్లే నీకు ప్రమాదం"
మొదట్లో ఇది మనకు చాలా రుచికరంగా అనిపిస్తుంది. పంది మాంసం వాసనకు ఎలుకలు పరుగెత్తినట్టు, ఈ కథల వాసనకు మనం కూడా పరుగెత్తుతాం. లైక్ లు, షేర్లు, కామెంట్లు, గొడవలు... అంతా ఒక ఆటలా అనిపిస్తుంది.
కానీ కొన్ని రోజుల తర్వాత మనకు అర్థమవుతుంది - మనం ఒక బావిలో ఇరుక్కుపోయామని.
అప్పటికే మనం మన స్నేహితులతో, బంధువులతో, పక్కింటి వాళ్లతో గొడవ పడి ఉంటాం. ఎవరిని ఓడించాలో, ఎవరిని తిట్టాలో అదే మన జీవితం అయిపోతుంది.
నిజానికి ఆ గొడవ నీది కాదు. ఆ ద్వేషం నీది కాదు. ఆ గేమ్ నీది కాదు. నువ్వు ఆ గేమ్ లో ఒక పావువి మాత్రమే.
ఆ బావిలోని చివరి ఎలుకలా, నువ్వు గెలిచాను అనుకుంటావు. కానీ నిజానికి నువ్వు ఓడిపోయావు. ఎందుకంటే నీ మనశ్శాంతిని, నీ సమయాన్ని, నీ జీవితాన్ని ఆ బావికే ఇచ్చేశావు.
బయటపడాలంటే ఏం చేయాలి?

1. ఆగి ఆలోచించు: 
నీకు కోపం వచ్చిన ప్రతిసారీ అడుగు - "ఈ కోపం నిజంగా నాదా? లేక ఎవరో నాలో నింపారా?"

2. ఎవరితోనూ పోట్లాడకు: నీ ఎదుటి వ్యక్తి కూడా నీలాగే ఆ బావిలో ఇరుక్కున్న మరో ఎలుకే. వాడితో పోట్లాడితే ఇద్దరూ ఆ బావిలోనే ఉంటారు.

3. తాడు కోసం చూడు: ఆ బావి నుంచి బయటపడటానికి ఉన్న ఏకైక మార్గం - ఆ కథ నుంచి బయటకు రావడం. న్యూస్ చూడటం ఆపడం కాదు, న్యూస్ నిన్ను కంట్రోల్ చేయకుండా చూడటం.
గుర్తుపెట్టుకో, బావిలో గెలిచిన ఎలుకకి బయట ప్రపంచంలో విలువ లేదు. బావి నుంచి బయటపడిన వాడికే నిజమైన స్వేచ్ఛ ఉంటుంది.
నీ జీవితం ఎలుకల బావిలా కావాలా? లేక స్వేచ్ఛగా ఎగిరే పక్షిలా కావాలా? నిర్ణయం నీదే.

Also Read: 

ఎవరినీ తక్కువ అంచనా వేయకు.. కాలం ఎప్పుడూ ఒకేలా ఉండదు చెబుతున్న భూస్వామి, జీతగాడు నీతి కథ..!!

శత్రువుల గురువు దగ్గర విద్య నేర్చుకున్న కచుడు.. శుక్రాచార్యుడి నుంచి పొందిన జ్ఞానం వెనుక అసలు కథ ఇదే!

అబద్దాలతో ఎప్పటికైనా నష్టాలు తప్పవని నిరూపించిన చిన్నారి చిట్టి కథ..!!