వ్యాపారం చేస్తామంటే చాలు.. జీతంతో పాటు సెలవులు.. ఉద్యోగుల కోసం ఐడీ ఫ్రెష్ CEO సంచలన నిర్ణయం..!!

PC Mustafa: సాధారణంగా తమ సంస్థల్లో పనిచేస్తున్న ఉద్యోగులు ఉద్యోగం మానేస్తున్నామంటే ఏ యాజమాన్యం అయినా సరే ఆందోళన చెందుతుంది. కానీ కర్నాటకకు చెందిన ఓ ప్రముఖ పారిశ్రామిక వేత్త మాత్రం దీనికి పూర్తి భిన్నంగా ఆలోచిస్తున్నారు. తన దగ్గర పనిచేసిన ఉద్యోగులు సొంతంగా వ్యాపారాలు ప్రారంభించేందుకు ఏకంగా ఆర్థిక సహాయం అందించి వారిని ప్రోత్సహిస్తున్నారు. అంతేకాదు ఒకవేళ వ్యాపారంలో విఫలమైనట్లయితే.. తిరిగి తమ కంపెనీలో ఉద్యోగంలోకి తీసుకుంటామంటూ భరోసాను కూడా కల్పిస్తున్నారు. ఆ ఆదర్శవంతమైన నాయకుడే బెంగళూరు కేంద్రంగా  పనిచేస్తున్ను ప్రముఖ ఫుడ్ బ్రాండ్ ఐడీ ఫ్రెష్ ఫుడ్ ఇండియా గ్లోబల్ సీఈవో ముస్తఫా పీసీ.

అయితే ఈ వినూత్న విధానం వెనక తన గత అనుభవమే ప్రేరణ అని ముస్తఫా లింక్డ్ ఇన్ లో తెలిపారు. కేవలం రూ. 50వేల పెట్టుబడితో బెంగళూరులో ఓ చిన్న వంటగదిలో ఐడీని ప్రారంభించి.. ఎన్నో తప్పులు చేసి..  నిద్రలేని రాత్రులు గడిపి.. ఇప్పుడు ఉన్నత స్థాయికి చేరుకున్నారు. మాపై మాకే నమ్మకం లేనప్పుడు కొద్దిమందిపై నమ్మకం ఉంచారు. అందుకే మేము ముందుకు సాగగలిగాం. ఆ నమ్మకం విలువేంటో నాకు తెలుసు. ఇప్పుడు అదే నమ్మకాన్ని నా ఉద్యోగులకు అందించాలని నేను అనుకుంటున్నాను అంటూ పేర్కొన్నారు.

మా బెస్ట్ ఎంప్లాయిస్ కొందరు ఉద్యోగం మానేయం బాధగా అనిపిస్తుంది. కానీ ఏదొక రోజు వారు సొంతంగా ఏదైనా వ్యాపారాన్ని నిర్మించి.. సమాజంపై మా కంటే గొప్ప ప్రభావాన్ని చూపిస్తే.. నా మనస్సు గర్వంతో నిండిపోతుంది. వారు తమ కలలను సాకారం చేసుకోవాలని మనస్ఫూర్తిగా కోరుకుంటున్నాను అని ముస్తఫా అన్నారు. ఇలాంటి విధానాన్ని ప్రకటించిన ఏకైక వ్యవస్థాపకుడు ముస్తఫా మాత్రమే కాదు.. 2021లో టెక్ కంపెనీ లాటిస్ కో ఫౌండర్ జాక్ ఆల్ట్ మన్ కూడా తమ సంస్థను విడిచిపెట్టి సొంత వ్యాపారం ప్రారంభించే ఉద్యోగులకు 100, 000 డాలర్లు పెట్టుబడిగా అందిస్తామని తెలిపారు. కొత్త తరం ఉద్యోగుల్లో వ్యవస్థాపక స్పూర్తిని నింపేందుకు ఈ నిర్ణయం తీసుకున్నట్లు ఆయన వివరించారు.

పీసీ ముస్తఫా సక్సెస్ స్టోరీ: 
ముస్తఫా కేరళలోని వయనాడ్‌లో ఒక దిగువ మధ్యతరగతి కుటుంబంలో జన్మించాడు. అతని తండ్రి అల్లం తోటలో పనిచేస్తూ రోజుకు కేవలం 10 రూపాయలు సంపాదించే ఒక రోజువారీ కూలీ. 10 సంవత్సరాల వయస్సులోనే ముస్తఫా..  అతని తోబుట్టువులు తమను, తమ కుటుంబాలను పోషించుకోవడానికి గ్రామంలో కట్టెలు అమ్మడం వంటి పనులు చేయవలసి వచ్చింది. ఈ విధంగా, అతను 150 రూపాయలు సంపాదించి తన మొదటి ఆర్థిక పెట్టుబడి పెట్టాడు. అతను ప్రతి పైసా పొదుపు చేసి ఒక మేకను కొన్నాడు.

ఆ తర్వాత అతను తన కుటుంబం కోసం ఒక ఆవును కొనడానికి తన మేకను అమ్మాడు. ఆవు పాల ద్వారా వచ్చిన డబ్బుతో, ఆ కుటుంబం చివరకు రోజుకు మూడు పూటలా భోజనం పెట్టగలిగింది. ఈలోగా, కొంత పొదుపు,  చిన్న పెట్టుబడులు అతనికి నేషనల్ ఇన్‌స్టిట్యూట్ ఆఫ్ టెక్నాలజీ (NIT)లో ప్రవేశం పొందడానికి, కంప్యూటర్ సైన్స్‌లో డిగ్రీ సంపాదించడానికి సహాయపడ్డాయి. డిగ్రీ పూర్తి చేసిన తర్వాత, ముస్తఫా మోటరోలాలో ఐటీ ఉద్యోగం సంపాదించి, ఆ తర్వాత దుబాయ్‌లోని సిటీబ్యాంక్‌కు మారాడు.

ముస్తఫా తిరిగి వచ్చి, బెంగళూరులోని ప్రతిష్టాత్మక ఇండియన్ ఇన్‌స్టిట్యూట్ ఆఫ్ మేనేజ్‌మెంట్ నుండి MBA పూర్తి చేశారు. MBA చదువుతున్నప్పుడే, ముస్తఫా తన కజిన్స్‌తో కలిసి దోసె, ఇడ్లీ పిండిని తయారు చేయడం ప్రారంభించారు. ఆ తర్వాత, తన కజిన్స్ సపోర్టుతో 2005లో 50,000వేలతో, తినడానికి సిద్ధంగా ఉండే ప్యాకేజ్డ్ ఆహారాలు, తాజా ఆహారాన్ని సరఫరా చేస్తూ తన సొంత బ్రేక్‌ఫాస్ట్ ఫుడ్ కంపెనీని ప్రారంభించారు. అనంతరం.. ఆయన ఇడ్లీ, దోసె పిండిని సరఫరా చేయడంపై దృష్టి సారించారు. ఇది ఆయన వ్యాపారానికి ఒక పెద్ద మలుపుగా మారింది.

కష్టాల తర్వాత విజయం:
భారతీయులు ప్యాక్ చేసిన ఆహారాన్ని నమ్మరని.. ఇక్కడ ప్యాక్ చేసిన ఆహారాన్ని సురక్షితం కానిదిగా భావిస్తారని ముస్తఫా పిసి వివరించారు. మేము ఉత్పత్తిని ప్రారంభించినప్పుడు, బ్యాటర్ ప్యాకేజీని ఎవరూ కొనుగోలు చేయలేదు. మొదటగా, మేము మార్కెట్‌కు 100 ప్యాకెట్లను పంపగా, వాటిలో 90 తిరిగి వచ్చాయి. క్రమంగా, ఐడి ఫ్రెష్ ఫుడ్స్ అమ్మకాలు పెరిగాయి. ఇది బ్రేక్‌ఫాస్ట్ ఫుడ్ పరిశ్రమలో ఒక ప్రముఖ పేరుగా మారింది. తాను ముందుగా తయారుచేసిన బ్యాటర్‌లో ఎలాంటి రసాయనాలను ఉపయోగించకపోవడమే తన బ్రాండ్‌ను ప్రత్యేకంగా నిలుపుతుందని ముస్తఫా ఇంకా వివరించారు.

Also Read: 

మూడేళ్లుగా ఎదురుచూపులేనా..? OPS పునరుద్ధరణ కోసం నవంబర్ 17న ఉద్యోగుల సామూహిక సెలవుల బాట..!!