Telangana Politics: తెలంగాణ రాజకీయాలు @వ్యక్తిగత దూషణలు..అధికార, విపక్షాల తీరుపై సూటి ప్రశ్న!

Telangana Political News: ప్రస్తుత తెలంగాణ రాజకీయాల్లో నాయకులు పరస్పరం చేసుకుంటున్న వ్యక్తిగత విమర్శలపై తీవ్ర చర్చ నడుస్తోంది. ముఖ్యంగా అమెరికాలో నివసిస్తున్న ఎన్ఆర్ఐలను ఉద్దేశించి 'ప్లేట్లు కడిగేవాళ్లు, బాత్‌రూమ్‌లు కడిగేవాళ్లు' అని మాట్లాడటం ముఖ్యమంత్రి స్థాయిలో ఉన్నవారికి తగదని జీ తెలుగు న్యూస్ ఎడిటర్ శ్రీ భరత్ స్పష్టం చేశారు. గతంలో కేసీఆర్ ప్రతిపక్షంలో ఉన్నప్పుడు తీవ్ర పదజాలాన్ని ఉపయోగించినప్పటికీ, ముఖ్యమంత్రి బాధ్యతలు చేపట్టాక తన భాషను తగ్గించుకుని పరిణతితో వ్యవహరించారని ఆయన ఈ సందర్భంగా గుర్తుచేశారు.

జాతీయ స్థాయిలో నరేంద్ర మోదీ, రాహుల్ గాంధీ మధ్య రాజకీయం ప్రధానంగా అభివృద్ధి అంశాల చుట్టూనే సాగుతోందని, అయితే తెలుగు రాష్ట్రాల్లో నేతలు వ్యక్తిగత విషయాలపై ఎక్కువ వెళ్తున్నారని ఎడిటర్ శ్రీ భరత్ అభిప్రాయపడ్డారు. రేవంత్ రెడ్డి ప్రతిపక్షంలో ఉన్నప్పుడు వ్యక్తిగతంగా మాట్లాడితే జనం మెచ్చినప్పటికీ, అధికారంలోకి వచ్చాక సాధించిన పురోగతిని సభల్లో వివరించడమే ముఖ్యం అని ఆయన పేర్కొన్నారు.

పరస్పర ఆరోపణలు ప్రజలకు చేటే..
ఇటీవల సిరిసిల్ల సభ ద్వారా సీఎం రేవంత్ రెడ్డి తాను సిరిసిల్ల, సిద్దిపేటలోనూ గెలుస్తామనే సందేశం ఇవ్వాలని భావించినప్పటికీ, పక్క నియోజకవర్గం నుంచి ఒక్కొక్కరికి రూ. 500 ఇచ్చి జనాన్ని తీసుకొచ్చారని బీఆర్ఎస్ ఆరోపించింది. అయితే కొడంగల్‌లో రేవంత్ రెడ్డి, సిరిసిల్లలో కేటీఆర్ ఓడిపోయే ప్రసక్తే లేదని శ్రీ భరత్ విశ్లేషించారు. గతంలో ఏపీలో 'వై నాట్ కుప్పం' అన్న జగన్ సొంత జిల్లాలోనే దెబ్బతిన్న విషయం ఆయన గుర్తుచేశారు.

అదే విధంగా కేసీఆర్ గజ్వేల్‌ను, హరీష్ రావు సిద్దిపేటను, కేటీఆర్ సిరిసిల్లను అభివృద్ధి చేసినట్లే, రేవంత్ రెడ్డి కూడా కొడంగల్‌ను అభివృద్ధి చేస్తున్నారని తెలిపారు. నాయకులు వ్యక్తిగత దూషణలు పక్కనపెట్టి అభివృద్ధి పోటీపైనే దృష్టి సారించాలని జీ తెలుగు న్యూస్ ఎడిటర్ శ్రీ భరత్ సుస్పష్టం చేశారు.